Orol dengizining Qoraqalpog‘iston mintaqasidagi saqlanib qolgan sharqiy va g‘arbiy qismlarida suvning sho‘rlanish darajasi 120-160 gramm/litrni tashkil etadi. Bu haqda Ajiniyoz nomidagi Nukus davlat pedagogika institutida “Janubiy Orolbo‘yi biologik xilma-xilligini saqlash, qayta tiklash va himoya qilishning ekologik masalalari” mavzusidagi ilmiy-nazariy konferensiyada bayonot qilgan rossiyalik olim Pyotr Zavyalov ma’lum qildi, deya xabar beradi “Karinform”.
Bunday sho‘rlanish darajasida ko‘pchilik dengiz jonzotlari qirilib ketadi. Ammo bu Orol dengizi o‘lik dengizga aylandi, degan xulosani anglatmaydi. Hozirgi paytda dengizning saqlanib qolgan suvida artemiya va ularning sistalari, fitoplanktonlar va bentos kabi jonzotlar turlari uchraydi.
Rossiya Fanlar Akademiyasi muxbir a’zosi, geografiya fanlari doktori, P.Shirshov nomidagi Okeanologiya instituti direktori o‘rinbosari P.Zavyalov Orol dengizi bo‘yicha dunyoga mashhur ekspertlardan biri hisoblanib, uning rahbarligida dengizning Qozog‘iston va Qoraqalpog‘iston Respublikalari mintaqasiga 21 marta ekspeditsiya tashkillashtirilgan. Ekspeditsiyalar davomida dengiz suvining sho‘rlanish darajasi, sirkulyatsiyasi, biologik xilma-xilligi teran o‘rganilgan.
Konferensiyada rossiyalik olim oxirgi 20 yillik davrda Orol dengizi suvlarining gidrologik xarakteristikasi bo‘yicha ma’ruza qildi.
Konferensiya doirasida institut rektori B.Otemuratov va Rossiya Fanlar Akademiyasi o‘rtasida Orol dengizining qurigan tubida amalga oshiriladigan kelgusi ekspetsiyalarni hamkorlikda tashkillashtirish, unga institutning professor-o‘qituvchilarini va yosh ilmiy tadqiqotchilarini jalb qilish hamda ilmiy monografiyalar, o‘quv qo‘llanmalarini yozish bo‘yicha ikki tomonlama hamkorlik shartnomasi imzolandi.
Izoh (0)