Сўз устаси Ҳалима Ибрагимова «Бировнинг таҳоратига намоз ўқийдиган» қизларни танқид остига олди

Сўз устаси ва актриса Ҳалима Ибрагимова ҳозирги кунда оилавий ажримларнинг кўплигини йигит ва қизнинг совчилар орқали эмас, балки интернет орқали танишаётгани билан изоҳлайди. Бу ҳақда у журналист Миролим Исажонов билан суҳбатда айтиб ўтди.

Биламизки, сиз жуда кеч турмушга чиққансиз. Ҳозир бахтли бир хонадон бекаси, икки фарзанднинг онаси ва севимли рафиқасиз. Бугунги кун ёшларининг аксарияти ҳаётнинг оқу қорасини тўла англаб етмай, эрта оила қураётгани, уларнинг кўпчилиги муқаддас қўрғонга енгил назар билан қараб, осонгина барбод қилаётгани янада ачинарлидир. Бундай дилни ларзага солувчи манзараларга муносабатингиз қандай?

Йигирма икки ёшимда биринчи марта совчи келганида, яқинларим турмушга узатмоқчи бўлишган. Аммо онамнинг соғлиғи ва ўзим мустақил ҳаёт қуришга тайёр эмаслигимни билганим боис бунга кўнмаганман. Мактабда ўқиб юрган кезларим дадам вафот этган. Оилада барчамиз қиз фарзанд бўлганимиз туфайли рўзғорнинг юки кўпинча менинг зиммамга тушарди ва уддасидан чиқишга интилардим. Бунинг устига у кезларда иккала опам турмушга чиқиб кетишган, синглим эса ёш эди. Онамни йиғлатмаслик, уни ҳеч кимдан кам қилмай, парваришлаш, коммунал тўловларни вақтида тўлаш ниятида тиним билмай ишлардим, ҳалол меҳнат қилардим. Оилада ўғил бўлмагани туфайли фикру хаёлим пул топиш бўлган. Эрга тегиб кетсам, волидамнинг ҳоли нима бўлади, деган саволлар менга тинчлик бермасди. Синглимни мендан олдин турмушга узатганмиз. Ўзим эса йигирма саккиз ёшимда оила қурдим. Яратганга шукр, шахсий ҳаётимдан сира нолимайман.

Бугун ёш оилаларнинг эрта дарз кетаётгани оғриқли мавзу. Назаримда, янги ҳаёт остонасида турган кўплаб ука-сингилларимиз ҳали ёш, бунинг устига ҳаёт қийинчиликлари билан тўқнаш келмагани ҳам ажримларни келтириб чиқармоқда. Уларнинг кўпчилиги бир-бирларини тўлиқ билмасдан, ташқи кўриниши, мол-давлат, енгил-елпи ҳою ҳавасларга учиб, ришталарини боғлашмоқда. Ички туйғулар, келгусидаги оилавий мақсадлар, режалар эса иккинчи даражали бўлиб қоляпти. Кейин айрим йигит-қизларнинг танишуви совчилар орқали эмас, балки ижтимоий тармоқлар сабаб юзага келаётгани ҳам ажралишларнинг бир омили бўлаяпти ва бу жуда ачинарли ҳолат. Интернетни кўп кузатганим боис баъзи қизлар ўзгалар тайёрлаган пишириқ ва таомларни ўзи пиширгандек кўрсатиб, бировни таҳоратига намоз ўқиётгани ҳам киши ғашини келтиради. Бу каби ҳолатларнинг келиб чиқмаслиги учун аввало, ота-оналар фарзанди тарбияси, унинг келажаги ҳақида қайғуриши, ўғил-қизини бирор ҳунарли қилиб, мустақил рўзғор тебратишга тайёрлаб, сўнг бошини қовуштириши шарт, деб ўйлайман.

Ҳалима Ибрагимова, сўз устаси, комик актриса