So‘z ustasi Halima Ibragimova “Birovning tahoratiga namoz o‘qiydigan” qizlarni tanqid ostiga oldi

So‘z ustasi va aktrisa Halima Ibragimova hozirgi kunda oilaviy ajrimlarning ko‘pligini yigit va qizning sovchilar orqali emas, balki internet orqali tanishayotgani bilan izohlaydi. Bu haqda u jurnalist Mirolim Isajonov bilan suhbatda aytib o‘tdi.

Bilamizki, siz juda kech turmushga chiqqansiz. Hozir baxtli bir xonadon bekasi, ikki farzandning onasi va sevimli rafiqasiz. Bugungi kun yoshlarining aksariyati hayotning oqu qorasini to‘la anglab yetmay, erta oila qurayotgani, ularning ko‘pchiligi muqaddas qo‘rg‘onga yengil nazar bilan qarab, osongina barbod qilayotgani yanada achinarlidir. Bunday dilni larzaga soluvchi manzaralarga munosabatingiz qanday?

Yigirma ikki yoshimda birinchi marta sovchi kelganida, yaqinlarim turmushga uzatmoqchi bo‘lishgan. Ammo onamning sog‘lig‘i va o‘zim mustaqil hayot qurishga tayyor emasligimni bilganim bois bunga ko‘nmaganman. Maktabda o‘qib yurgan kezlarim dadam vafot etgan. Oilada barchamiz qiz farzand bo‘lganimiz tufayli ro‘zg‘orning yuki ko‘pincha mening zimmamga tushardi va uddasidan chiqishga intilardim. Buning ustiga u kezlarda ikkala opam turmushga chiqib ketishgan, singlim esa yosh edi. Onamni yig‘latmaslik, uni hech kimdan kam qilmay, parvarishlash, kommunal to‘lovlarni vaqtida to‘lash niyatida tinim bilmay ishlardim, halol mehnat qilardim. Oilada o‘g‘il bo‘lmagani tufayli fikru xayolim pul topish bo‘lgan. Erga tegib ketsam, volidamning holi nima bo‘ladi, degan savollar menga tinchlik bermasdi. Singlimni mendan oldin turmushga uzatganmiz. O‘zim esa yigirma sakkiz yoshimda oila qurdim. Yaratganga shukr, shaxsiy hayotimdan sira nolimayman.

Bugun yosh oilalarning erta darz ketayotgani og‘riqli mavzu. Nazarimda, yangi hayot ostonasida turgan ko‘plab uka-singillarimiz hali yosh, buning ustiga hayot qiyinchiliklari bilan to‘qnash kelmagani ham ajrimlarni keltirib chiqarmoqda. Ularning ko‘pchiligi bir-birlarini to‘liq bilmasdan, tashqi ko‘rinishi, mol-davlat, yengil-yelpi hoyu havaslarga uchib, rishtalarini bog‘lashmoqda. Ichki tuyg‘ular, kelgusidagi oilaviy maqsadlar, rejalar esa ikkinchi darajali bo‘lib qolyapti. Keyin ayrim yigit-qizlarning tanishuvi sovchilar orqali emas, balki ijtimoiy tarmoqlar sabab yuzaga kelayotgani ham ajralishlarning bir omili bo‘layapti va bu juda achinarli holat. Internetni ko‘p kuzatganim bois ba’zi qizlar o‘zgalar tayyorlagan pishiriq va taomlarni o‘zi pishirgandek ko‘rsatib, birovni tahoratiga namoz o‘qiyotgani ham kishi g‘ashini keltiradi. Bu kabi holatlarning kelib chiqmasligi uchun avvalo, ota-onalar farzandi tarbiyasi, uning kelajagi haqida qayg‘urishi, o‘g‘il-qizini biror hunarli qilib, mustaqil ro‘zg‘or tebratishga tayyorlab, so‘ng boshini qovushtirishi shart, deb o‘ylayman.

Halima Ibragimova, so‘z ustasi, komik aktrisa