«Атлас байрами» энди Ханчжоу–Валенсия йўналиши бўйлаб халқаро миқёсда нишонланади. Бу ҳақда Марғилон шаҳридаги Эркин Воҳидов номидаги ижодкорлар боғида ўтказилган «Атлас байрами» анъанавий тўқимачилик фестивалининг тантанали ёпилиш маросимида маълум қилинди, дея хабар бермоқда «Дарё» мухбири.
Маросимда сўз олган ЮНЕСКОнинг Ўзбекистондаги ваколатхонаси раҳбари Дандев Бадарч мазкур фестиваль чин маънода атласнинг, Марғилон ва Фарғонанинг байрами бўлганини таъкидлади.
Дандев Бадарч фестиваль юқори даражада ташкил этилгани учун миннатдорлик билдириб, Фарғона вилояти ҳокими Шуҳрат Ғаниевга ЮНЕСКОнинг эсдалик нишонини топширди.
«Атлас байрами» фестивалида Туркия, Индонезия, Хитой, Испания, Франция, Россия, Тожикистон, Жанубий Корея, Япония, Қозоғистон, Польша, Германия каби 30 дан ортиқ давлатдан меҳмонлар иштирок этди.
– Бу йилги фестиваль чинакам маънода халқаро мақомга эга бўлди. Ипакчилик соҳаси мутахассислари маърузалари, семинарлар, маҳорат сабоқлари, модалар намойиши, кўргазмаларнинг барчаси иштирокчиларга ёрқин онларни ҳадя этди. Ўйлайманки, келгуси йилларда тантананинг нуфузи янада юксалади. Марғилонни, ушбу байрамни бир умр ёдимда сақлаб қолиш, фестивални ўзим билан бирга олиб кетиш учун 12 метр адрас матосидан сотиб олдим. Ватанимда, Индонезияда кийган адрас кўйлагим орқали ҳамиша «Атлас байрами»ни эслаб юраман, – дейди Жакарта тўқимачилик музейи раҳбари Мария Ваварунти
Ҳунармандчиликни ривожлантириш марказида ўтказилган маҳорат сабоқларида 60 дан ортиқ иштирокчи ҳунармандчиликнинг турли йўналишларида билим ва кўникмасини оширди. Машғулотларда фаол иштирок этган қатнашчиларга ташкилотчилар томонидан гувоҳномалар топширилди.
Тадбир доирасида ош танлови ҳам ўтказилди. Унда Марғилондаги барча маҳалла фуқаролар йиғинлари ошпазлари гуруҳларга бўлинган ҳолда баҳслашди. Тансиқ ва ўзига хос паловлар меҳмонларга тортиқ қилиниб, шу орқали ғолиблар аниқланди.
«Буюк ипак йўлида Шарқ ва Ғарб маданиятининг ўзаро таъсири: Ханчжоу, Марғилон, Валенсия» мавзусида ўтказилган илмий конференцияда хорижлик мутахассисларнинг абрли матоларни тиклаш ва тайёрлаш, халқ амалий санъатини ривожлантиришга оид маърузалари тингланди.
Фестиваль давомида мўғилистонлик, россиялик, тожикистонлик, қирғизистонлик ва ўзбекистонлик ёш ҳунармандлар, дизайнерлар ижодий ишларининг сара намуналари намойиши ўтказилди.
Фестиваль якунида ёш дизайнерларни тақдирлаш маросими ва гала-концерт ўтказилди.
Изоҳ (0)