“Atlas bayrami” endi Xanchjou–Valensiya yo‘nalishi bo‘ylab xalqaro miqyosda nishonlanadi. Bu haqda Marg‘ilon shahridagi Erkin Vohidov nomidagi ijodkorlar bog‘ida o‘tkazilgan “Atlas bayrami” an’anaviy to‘qimachilik festivalining tantanali yopilish marosimida ma’lum qilindi, deya xabar bermoqda “Daryo” muxbiri.
Marosimda so‘z olgan YuNESKOning O‘zbekistondagi vakolatxonasi rahbari Dandev Badarch mazkur festival chin ma’noda atlasning, Marg‘ilon va Farg‘onaning bayrami bo‘lganini ta’kidladi.
Dandev Badarch festival yuqori darajada tashkil etilgani uchun minnatdorlik bildirib, Farg‘ona viloyati hokimi Shuhrat G‘aniyevga YuNESKOning esdalik nishonini topshirdi.
“Atlas bayrami” festivalida Turkiya, Indoneziya, Xitoy, Ispaniya, Fransiya, Rossiya, Tojikiston, Janubiy Koreya, Yaponiya, Qozog‘iston, Polsha, Germaniya kabi 30 dan ortiq davlatdan mehmonlar ishtirok etdi.
– Bu yilgi festival chinakam ma’noda xalqaro maqomga ega bo‘ldi. Ipakchilik sohasi mutaxassislari ma’ruzalari, seminarlar, mahorat saboqlari, modalar namoyishi, ko‘rgazmalarning barchasi ishtirokchilarga yorqin onlarni hadya etdi. O‘ylaymanki, kelgusi yillarda tantananing nufuzi yanada yuksaladi. Marg‘ilonni, ushbu bayramni bir umr yodimda saqlab qolish, festivalni o‘zim bilan birga olib ketish uchun 12 metr adras matosidan sotib oldim. Vatanimda, Indoneziyada kiygan adras ko‘ylagim orqali hamisha “Atlas bayrami”ni eslab yuraman, – deydi Jakarta to‘qimachilik muzeyi rahbari Mariya Vavarunti
Hunarmandchilikni rivojlantirish markazida o‘tkazilgan mahorat saboqlarida 60 dan ortiq ishtirokchi hunarmandchilikning turli yo‘nalishlarida bilim va ko‘nikmasini oshirdi. Mashg‘ulotlarda faol ishtirok etgan qatnashchilarga tashkilotchilar tomonidan guvohnomalar topshirildi.
Tadbir doirasida osh tanlovi ham o‘tkazildi. Unda Marg‘ilondagi barcha mahalla fuqarolar yig‘inlari oshpazlari guruhlarga bo‘lingan holda bahslashdi. Tansiq va o‘ziga xos palovlar mehmonlarga tortiq qilinib, shu orqali g‘oliblar aniqlandi.
“Buyuk ipak yo‘lida Sharq va G‘arb madaniyatining o‘zaro ta’siri: Xanchjou, Marg‘ilon, Valensiya” mavzusida o‘tkazilgan ilmiy konferensiyada xorijlik mutaxassislarning abrli matolarni tiklash va tayyorlash, xalq amaliy san’atini rivojlantirishga oid ma’ruzalari tinglandi.
Festival davomida mo‘g‘ilistonlik, rossiyalik, tojikistonlik, qirg‘izistonlik va o‘zbekistonlik yosh hunarmandlar, dizaynerlar ijodiy ishlarining sara namunalari namoyishi o‘tkazildi.
Festival yakunida yosh dizaynerlarni taqdirlash marosimi va gala-konsert o‘tkazildi.
Izoh (0)