Ўзбекистонда яна «миллионлаб сайёҳлар» ҳақида гапира бошланди, деб ёзмоқда Spot. Хусусан, Ўзбекистон бош вазири ўринбосари Азиз Абдуҳакимов туризм соҳасидаги энг муҳим ютуқлар ҳақида гапира туриб, 2018 йилнинг саккиз ойи давомида туристлар сони икки баробарга ошганини айтиб ўтган.
«2018 йилнинг 8 ойи давомида хорижий ташрифчилар сони 3,4 миллион кишини ташкил этди, бу 2017 йилнинг шу давридаги 1,5 миллион кишилик кўрсаткичдан 226 фоизга кўп. Прогнозларга кўра, йил охирига бориб Ўзбекистонга ташриф буюрган чет эллик сайёҳлар сони 4,8 миллион кишини ташкил этади (дастлабки прогнозларда 3,3 миллион бўлиши тахмин қилинган эди)», — дейилади хабарда.
Азиз Абдуҳакимов баҳорда берган интервьюсида туристлар сонига доир статистикани қайта кўриб чиқиб, ҳақиқий рақамлар асосида Туризм қўмита олдига ҳақиқий вазифаларни қўйишга қарор қилинганини айтиб ўтганди — шунда туризмдан келаётган реал даромадни ҳисоблаш, инвестициялар бўйича прогнозларни тайёрлаш, инфратузилмалар ва бошқа масалаларни ривожлантириш осонроқ бўлишини маълум қилганди.
Аввалги йилларда Ўзбекистонга ҳар йили 2,5 миллионга яқин турист келаётгани ҳақида айтиларди, чунки Жаҳон сайёҳлик ташкилоти методологияси бўйича мамлакатга кириб келган ҳар бир чет эл фуқароси автоматик равишда сайёҳ деб ҳисобга олинади. Азиз Абдуҳакимов Қозоғистон, Грузия, Қирғизистон ёки Россияда ҳам туристлар сони худди шундай ҳисобга олинишини айтиб ўтганди.
«Бу мамлакатлар ҳам миллионлаб туристлар келди, деб ҳисобот беради. Лекин бу вазиятга нисбатан ҳаққоний кўз билан қаралса, ушбу оқимнинг 70—80 фоизини қўшни мамлакатлардан келган меҳмонлар ташкил этади. Табиийки, улар меҳмонхоналарда қолмайди, одатда уларнинг сафари бир кунлик бўлади», — деб айтганди Азиз Абдуҳакимов баҳорда.
Абдуҳакимов меҳмонхоналарда тунаб қолиб, сувенирлар сотиб олиб, пул сарфлайдиган ҳақиқий сайёҳлар сони нисбатан камлигига эътибор қаратганди: «Ҳисоб-китобларимиз бўйича, 2017 йилда бундай сайёҳлар сони 200 мингни ташкил этган. Бу йил биз ўз олдимизга 350 минг сайёҳни жалб этишни вазифа қилиб қўйдик, 2020 йилга бориб эса бу рақамни 500 мингга олиб чиқиш мақсадидамиз».
Изоҳ (0)