O‘zbekistonda yana “millionlab sayyohlar” haqida gapira boshlandi, deb yozmoqda Spot. Xususan, O‘zbekiston bosh vaziri o‘rinbosari Aziz Abduhakimov turizm sohasidagi eng muhim yutuqlar haqida gapira turib, 2018-yilning sakkiz oyi davomida turistlar soni ikki barobarga oshganini aytib o‘tgan.
“2018 yilning 8 oyi davomida xorijiy tashrifchilar soni 3,4 million kishini tashkil etdi, bu 2017-yilning shu davridagi 1,5 million kishilik ko‘rsatkichdan 226 foizga ko‘p. Prognozlarga ko‘ra, yil oxiriga borib O‘zbekistonga tashrif buyurgan chet ellik sayyohlar soni 4,8 million kishini tashkil etadi (dastlabki prognozlarda 3,3 million bo‘lishi taxmin qilingan edi)”, — deyiladi xabarda.
Aziz Abduhakimov bahorda bergan intervyusida turistlar soniga doir statistikani qayta ko‘rib chiqib, haqiqiy raqamlar asosida Turizm qo‘mita oldiga haqiqiy vazifalarni qo‘yishga qaror qilinganini aytib o‘tgandi — shunda turizmdan kelayotgan real daromadni hisoblash, investitsiyalar bo‘yicha prognozlarni tayyorlash, infratuzilmalar va boshqa masalalarni rivojlantirish osonroq bo‘lishini ma’lum qilgandi.
Avvalgi yillarda O‘zbekistonga har yili 2,5 millionga yaqin turist kelayotgani haqida aytilardi, chunki Jahon sayyohlik tashkiloti metodologiyasi bo‘yicha mamlakatga kirib kelgan har bir chet el fuqarosi avtomatik ravishda sayyoh deb hisobga olinadi. Aziz Abduhakimov Qozog‘iston, Gruziya, Qirg‘iziston yoki Rossiyada ham turistlar soni xuddi shunday hisobga olinishini aytib o‘tgandi.
“Bu mamlakatlar ham millionlab turistlar keldi, deb hisobot beradi. Lekin bu vaziyatga nisbatan haqqoniy ko‘z bilan qaralsa, ushbu oqimning 70—80 foizini qo‘shni mamlakatlardan kelgan mehmonlar tashkil etadi. Tabiiyki, ular mehmonxonalarda qolmaydi, odatda ularning safari bir kunlik bo‘ladi”, — deb aytgandi Aziz Abduhakimov bahorda.
Abduhakimov mehmonxonalarda tunab qolib, suvenirlar sotib olib, pul sarflaydigan haqiqiy sayyohlar soni nisbatan kamligiga e’tibor qaratgandi: “Hisob-kitoblarimiz bo‘yicha, 2017-yilda bunday sayyohlar soni 200 mingni tashkil etgan. Bu yil biz o‘z oldimizga 350 ming sayyohni jalb etishni vazifa qilib qo‘ydik, 2020 yilga borib esa bu raqamni 500 mingga olib chiqish maqsadidamiz”.
Izoh (0)