Самарқанд вилоятида даладан пахта кўсагини ўғирлаган фуқароларга чоралар кўрилди

Самарқанд вилоятида 10 сентябрдан пахтани пайҳон қилинишини олдини олишга қаратилган профилактик тадбирлар ўтказиб келинмоқда, дея хабар бермоқда «Дарё» мухбири Фарҳод Норбўтаев.

Профилактик тадбирлар давомида вилоят ИИБ ходимлари томонидан чорва ҳайвонларининг ғўзани пайҳон қилишига доир 28 та, фуқаролар томонидан кўсак юлиш билан боғлиқ 5 та ҳолат аниқланган.

Масалан, 13 сентябрга ўтар кечаси Каттақўрғоннинг Равот қишлоғида яшовчи Ғ.Б. «Умурзоқ Баракали замин» фермер хўжалиги даласидан пахта кўсакларини юлиб, олиб кетаётган вақтида ҳуқуқни муҳофаза қилувчи органлар ходимлари томонидан ушланган.

11 сентябрь куни эрта тонгда Пахтачи туманининг Истиқбол қишлоғида яшовчи С.Ш. шу қишлоқда жойлашган «Ойдин» фермер хўжалигига тегишли 10 гектарлик пахта майдонидан 18 килограмм пахта кўсагини териб, олиб кетаётган вақтида ушланган.

Шу туманнинг бошқа — Сарой қишлоғида яшовчи икки фуқаро эса қишлоққа ёндош «Абду-ота» фермер хўжалигининг пахта майдонидан жами 26 килограмм пахта кўсагини териб, олиб кетаётган вақтида қўлга олинган.

Самарқанд вилоят ИИБ матбуот хизмати бошлиғи Ширин Норматованинг маълум қилишича, Пахтачи туманида бўлиб ўтган сайёр суд мажлисида ушбу фуқароларга нисбатан Маъмурий жавобгарлик тўғрисидаги кодекснинг тегишли моддалари билан маъмурий жавобгарлик белгиланган.

Бундан ташқари, уларнинг зиммасига фермер хўжаликларига етказилган зарарни қоплаб бериш масъулияти ҳам юклатилган.