Олий Мажлис Сенати раиси Ниғматилла Йўлдошев ва Қонунчилик палатаси спикери Нурдинжон Исмоилов Сурхондарё вилояти Музработ туманида илғор фермерлар, тўртта секторлар ва қишлоқ хўжалиги ташкилотлари раҳбарлари билан учрашди. ЎзА хабарига кўра, 4 август куни бўлиб ўтган тадбирда сенаторлар, депутатлар, оқсоқоллар, ҳудуддаги секторлар ва қишлоқ хўжалиги корхоналари раҳбарлари, фермерлар иштирок этган.
Учрашувда Президент Шавкат Мирзиёев раислигида 31 июль куни ғўза ривожини жадаллаштириш, ғалла ўримидан бўшаган майдонларга такрорий экинлар экиш, аҳоли томарқасидан самарали фойдаланиш ва қишлоқ хўжалиги маҳсулотларини экспорт қилиш масалаларига бағишланган видеоселектор йиғилишида белгилаб берилган вазифалар ижроси, қишлоқ хўжалиги маҳсулотлари ишлаб чиқарувчилар учун яратилаётган шароитлар ҳақида атрофлича сўз юритилган.
Сурхондарё вилоятида 2018 йилда3 048 фермер хўжалиги 78 500 гектардан ортиқ майдонда ғўза парваришламоқда. Айни пайтда пахтадан мўл ҳосил етиштириш учун воҳада тегишли чора-тадбирлар кўрилмоқда. Об-ҳаво меъёридан иссиқ келаётгани боис шарбат усулида тунги суғориш, култивация, ғўзани чилпиш ва бошқа дала юмушларини сифатли ташкил этишга эътибор қаратилмоқда.
«Бироқ айрим ҳудудларда ғўза парваришида камчиликларга йўл қўйилмоқда, айрим сектор раҳбарлари масъулиятни чуқур ҳис этмаётир. Ғўза парвариши учун зарбдор паллада бу борадаги ишларни сифатли бажариш ҳосилга ҳосил қўшишда муҳим аҳамият касб этади. Учрашувда шулар ҳақида фикр алмашилиб, галдаги вазифалар белгилаб олинди», — дейилади ЎзА ахборотида.
Бир куннинг ўзида Қизириқ ва Шеробод туманлари фермерлари билан ҳам шундай учрашувлар ўтказилган. Тадбирларда бир гуруҳ фермерлар, ҳудуддаги фермерларга хизмат кўрсатувчи корхоналар раҳбарларига Президент Шавкат Мирзиёев номидан қимматбаҳо совғалар топширилган.
5 август куни Денов туманида Олтинсой, Узун, Денов ва Сариосиё туманлари учун, Жарқўрғон туманида Шўрчи, Жарқўрғон ва Қумқўрғон туманлари фермерлари билан учрашувлар ўтказилиши режалаштирилган эди.
Изоҳ (0)