Самарқанд вилояти ИИБ ҳамда Иштихон тумани ИИБ Жиноят қидирув бўлими ходимлари ҳамкорликда Иштихон тумани худудида ўтказилган тезкор тадбирда тумандаги «Қорақуйли» қишлоғида жойлашган намунавий уйларнинг бирида ижарада яшаб келаётган фуқаро Т.М. яшаш уйи томорқасида гиёҳванд моддаларни етиштриб келаётганлиги аниқланди. Бу ҳақида «Дарё» мухбири Фарҳод Норбўтаев хабар бермоқда.
Вилоят ички ишлар матбуоти берган маълумотга кўра, холислар иштирокида кўздан кечирилганда хонадон томорқасининг 195 квадрат метр ер майдонида 242 туп ўсиб турган «каннабис» гиёҳванд моддасига ўхшаш ўсимликларни парваришлаб келаётганлиги аниқланган. Шунингдек, текширувлар давомида мазкур хонадондан 24 туп ярим қуритилган ҳолатдаги «марихуана» гиёҳвандлик ўсимлигига ўхшаш ўсимликни ҳам сақлаб келган.
Бундан ташқари мазкур хонадондаги ҳожатхона томида 16 туп, унинг ичидан 15 туп ҳўл ҳолатдаги «марихуана» гиёҳвандлик моддасига ўхшаш ўсимликлар топилган. Омборхонадан эса 988 грамм «марихуана» ва 15 грамм «марихуана» гиёҳвандлик ўсимлигига ўхшаш ўсимликларнинг уруғини сақлаб келаётганлиги аниқланган.
Т.М. яшаш уйига ИИБ ходимлари келиб қолганлигини билиб, томорқасида ўсиб турган 34 туп ҳўл холатдаги «каннабис» гиёҳвандлик ўсимлигига ўхшаш ўсимликларни юлиб қўшнисининг томорқасига девор ошириб отганлиги аниқланди.
Маълумот учун айтиб ўтиш жоизки, жорий йилнинг 6 ойи давомида Самарқанд вилоятида гиёҳванд моддаларни сотиш, ўтказиш билан боғлиқ 231 та жиноят аниқланган. Гиёҳвандлик билан боғлиқ жиноятлар ўтган йилнинг шу даврига нисбатан 32 тага кўпайган.
Изоҳ (0)