2018 йилнинг 27 июль куни соат тахминан 23:00 атрофида Жомбой туман ИИБ навбатчилик қисмига хабар тушган. Бу ҳақида «Дарё» мухбири Фарҳод Норбўтаев вилоят ИИБ матбуот хизмати маълумоти асосида хабар беради.
Хабарга кўра, ўша куни соат тахминан 20:00 атрофида Жомбой туманида яшовчи А.Н. Жомбой тумани «Олмазор» маҳалласи ҳудудида жойлашган «Зарафшон қўриқхонаси» ҳудудида йўқолган молини излаб юрган. Ўша вақтда номаълум шахс томонидан ов қуролидан отилган ўқ натижасида А.Н. олинган жароҳатлари билан Жомбой туман марказий шифохонасига мурожаат қилган.
Мазкур суиқасд қилиш жинояти бўйича жалб қилинган вилоят ИИБ Жиноят қидирув бўлими ва туман ИИБ ҳамда прокуратура ходимлари томонидан олиб борилган тезкор суриштирув ишлари натижасида ушбу жиноятни Жомбой тумани «Ертешар» қишлоғида яшовчи 1992 йилда туғилган фуқаро А.М. томонидан содир этилганлиги аниқланган.
Гумондор А.М. берган кўрсатмаларига асосан, 2018 йилнинг 27 июль куни соат тахминан 20:00 атрофида жабрланувчи А.Н.ни «Зарафшон қўриқхонаси»га кириб кетганлигини кўрган. Шу вақтда А.М. ўртада бўлган низо учун ўч олишни мақсад қилган. Яъни А.М. унаштирилган қизини номига доғ тушурувчи гапларни айтганлиги сабабли ўч олиш мақсадида ҳеч қандай ҳужжатларсиз уйида сақланаётган ов милтиғини олиб ёнида бўлган А.Х. билан биргаликда жабрланувчини қўриқхонадан чиқишини кутиб турган.
Жабрланувчи А.Н. осма сим кўприк орқали қўриқхонадан маҳалласига ўтаётган вақтида А.Х.нинг қаршилигига қарамасдан гумонланувчи А.М. ов қуроли билан жабрланувчи А.Н.га тан жароҳати етказган.
Жорий йилнинг 2 август куни гумонланувчи А.Х.нинг кўрсатмалари асосида воқеа жойи текширилганда, «Зарафшон қўриқхонаси»даги буталар орасидан ов милтиғи ичидаги гилза ҳамда гумондорлар жиноят содир этган вақт давомида эгнида бўлган кийимлари «Мирзаариқ» канали ёқасидаги ўсимлик орасидан далилий ашё сифатида топилган.
Мазкур жиноят иши бўйича А.М.га нисбатан Ўзбекистон Республикаси Жиноят Кодексининг 25, 97-моддаси 1-қисми ва 248-моддаси 1-қисмида назарда тутилган жиноятни содир этганликда ҳимоячи иштирокида гумонланувчи тариқасида иштирок этишга жалб қилиниб, Жиноят Процесуал Кодексининг 227-моддаси тартибида қўлга олинди.
Изоҳ (0)