Наманган вилоятидан Ҳаж сафарига отланган зиёратчиларнинг дастлабки гуруҳи «Наманган» халқаро аэропортидан Саудия Арабистонининг Мадина шаҳрига жўнаб кетди. Бу ҳақда «Наманган ҳақиқати» хабар бермоқда.
— Бундайин доруломон кунларга етказгани учун Аллоҳга минг карра шукроналар келтирсак арзийди, — дейди Наманган туманининг Муллакудинг қишлоғида яшовчи 101 ёшли Иброҳимжон ота Хўжаев. — Айниқса, биз нуронийларга қаратилаётган эътибордан бошимиз осмонда. 11 нафар фарзанднинг отаси, 70 дан ортиқ невара-эвара ва чевараларнинг бобоси сифатида мамлакатдаги тинчлик-фаровонлик боқий бўлиши, дастурхонимиздаги тўкинчиликка кўз тегмаслигини Яратгандан сўраб қоламан.
— Онам Саодатхон Қаюмова 80 ёшдалар. Бутун умрлари давомида мен каби 7 нафар фарзанднинг баркамол инсон бўлиб вояга етиши учун меҳнат қилдилар. Бугун ўз фарзандлик бурчимни адо этиб, у кишини муқаддас ҳаж зиёратига олиб кетаётганимдан мамнунман, — дейди Наманган шаҳрилик Аҳрол Мамажонов.
Ўзбекистон Мусулмонлари идораси Наманган вилоят вакиллиги Ҳаж ва умра масалалари бўйича мутахассиси Абдуллохон Каримовга кўра, бу йилги мавсумда 989 нафар наманганлик Ҳаж сафарига йўл олмоқда. Шунингдек, Андижон ва Фарғона вилоятидан бўлган икки мингга яқин зиёратчи ҳам «Наманган» халқаро аэропортидан Ҳаж сафарига кузатилади. Кузатув маросимини тантанали тарзда ўтказиш, божхона текшируви ва бошқа шу каби юмушларни намунали тарзда ташкил қилиш учун барча тайёргарликлар кўриб қўйилган.
Жорий йилги мавсумда «Наманган» халқаро аэропортидан жами 2967 нафар ўзбекистонлик Ҳаж сафарига йўл олади. Бу жараён 13 августга қадар давом этади.
Изоҳ (0)