Бу йил Ўзбекистонда ғўза зараркунандалари ва ҳашаротлари кўпайган, бу ҳолат эса жиддий муаммо бўлиб турибди. Президент матбуот хизматининг хабар беришича, бу маълумот 31 июль куни Ўзбекистон Президенти Шавкат Мирзиёев раислигида ғўза ривожини жадаллаштириш, ғалла ўримидан бўшаган майдонларга такрорий экинлар экиш, аҳоли томорқаларидан самарали фойдаланиш ва қишлоқ хўжалиги маҳсулотларини экспорт қилиш масалаларига бағишланган видеоселектор йиғилишида маълум қилинган.
Олимларнинг аниқлашича, биргина кўсак қурти капалагининг қишдан чиқиш даражаси 76 фоизни ташкил этмоқда. Бу охирги йиллардаги энг юқори кўрсаткичдир.
Ҳашаротларнинг қишдан чиқиш даражаси 50 фоиз бўлганда фавқулодда ҳолат деб баҳоланади. Бу йил эса ҳашарот 1,5 баробар кўп. Бундан барча раҳбарлар тегишли хулоса чиқариши, айниқса, фермерлар ўз ҳосили учун маъсулиятни кучайтириши шарт.Йиғилишда зараркунанда ва ҳашаротларга қарши курашиш ишларини тизимли ташкил қилиш, ғўзага илмий ёндашув асосида кимёвий ишлов бериш бўйича чора-тадбирлар белгиланган.Видеоселекторда ғўзани суғориш масаласига ҳам тўхталиб ўтилган. Сувдан мақсадли фойдаланиш, ғўза майдонларини суғориш жадвалини ишлаб чиқиш, узоқдаги фермер хўжалиги даласигача сув етиб боришини таъминлаш, «шарбат» усулида суғоришни ташкил қилиш бўйича топшириқлар берилган.Шавкат Мирзиёев, Ўзбекистон Президенти
Изоҳ (0)