Namangan viloyatidan Haj safariga otlangan ziyoratchilarning dastlabki guruhi “Namangan” xalqaro aeroportidan Saudiya Arabistonining Madina shahriga jo‘nab ketdi. Bu haqda “Namangan haqiqati” xabar bermoqda.
— Bundayin dorulomon kunlarga yetkazgani uchun Allohga ming karra shukronalar keltirsak arziydi, — deydi Namangan tumanining Mullakuding qishlog‘ida yashovchi 101 yoshli Ibrohimjon ota Xo‘jayev. — Ayniqsa, biz nuroniylarga qaratilayotgan e’tibordan boshimiz osmonda. 11 nafar farzandning otasi, 70 dan ortiq nevara-evara va chevaralarning bobosi sifatida mamlakatdagi tinchlik-farovonlik boqiy bo‘lishi, dasturxonimizdagi to‘kinchilikka ko‘z tegmasligini Yaratgandan so‘rab qolaman.
— Onam Saodatxon Qayumova 80 yoshdalar. Butun umrlari davomida men kabi 7 nafar farzandning barkamol inson bo‘lib voyaga yetishi uchun mehnat qildilar. Bugun o‘z farzandlik burchimni ado etib, u kishini muqaddas haj ziyoratiga olib ketayotganimdan mamnunman, — deydi Namangan shahrilik Ahrol Mamajonov.
O‘zbekiston Musulmonlari idorasi Namangan viloyat vakilligi Haj va umra masalalari bo‘yicha mutaxassisi Abdulloxon Karimovga ko‘ra, bu yilgi mavsumda 989 nafar namanganlik Haj safariga yo‘l olmoqda. Shuningdek, Andijon va Farg‘ona viloyatidan bo‘lgan ikki mingga yaqin ziyoratchi ham “Namangan” xalqaro aeroportidan Haj safariga kuzatiladi. Kuzatuv marosimini tantanali tarzda o‘tkazish, bojxona tekshiruvi va boshqa shu kabi yumushlarni namunali tarzda tashkil qilish uchun barcha tayyorgarliklar ko‘rib qo‘yilgan.
Joriy yilgi mavsumda “Namangan” xalqaro aeroportidan jami 2967 nafar o‘zbekistonlik Haj safariga yo‘l oladi. Bu jarayon 13-avgustga qadar davom etadi.
Izoh (0)