Ўзбекистон Президенти Шавкат Мирзиёев раислигида 31 июль куни бўлиб ўтган видеоселектор йиғилишида ғалладан бўшаган майдонларга такрорий экинлар экиш, шартнома тузиш ва бўнак маблағлари бериш масалаларига алоҳида эътибор қаратилди. Бу ҳақда Президент матбуот хизмати хабар бермоқда.
«Бугунги кунда дунёда озиқ-овқат маҳсулотларига талаб ва уларнинг нарх-навоси ошиб бормоқда. Бундай шароитда қишлоқ хўжалиги маҳсулотлари етиштиришни кўпайтириб, ички бозорни арзон озиқ-овқат билан тўлдириш ва экспорт ҳажмини ошириш жуда муҳим ҳисобланади», — дейилади расмий ахборотда.
Шу мақсадда жорий йилда ғалладан бўшаган 680 минг гектар майдонга такрорий экин экиш белгиланган. «Лекин орадан бир ойдан кўпроқ вақт ўтган бўлса-да, жойларда экиш ишлари тизимли ташкил қилинмаган, тўлиқ якунига етказилмаган», — дея қўшимча қилади Президент матбуот хизмати.Такрорий экин, бу – биринчи навбатда экспорт. Иккинчидан, озиқ-овқат маҳсулотларининг захираси, яъни ички бозордаги тўкинлик ва барқарор нарх-наво дегани.Йиғилишда мутасадди раҳбарларга такрорий экинлар учун зарур бўлган моддий-техник ресурсларни тўлиқ етказиб бериш ва агротехник тадбирларни ўз вақтида ўтказиш, маҳсулотларни харид қилиш бўйича қайта ишлаш корхоналари, экспортёр ва тайёрлов ташкилотлари билан шартномалар тузиш, фермерларга бўнак пулларини тўлаш юзасидан топшириқлар берилди.Шавкат Мирзиёев, Ўзбекистон Президенти
Изоҳ (0)