Абдужаббор Абдувоҳидов Ўзбекистон Президентининг фан, таълим, соғлиқни сақлаш ва спорт масалалари бўйича давлат маслаҳатчиси этиб тайинланди. Бу ҳақда, ҳукуматдаги ўз манбасига асосланиб, «Газета.uz» хабар бермоқда.
Ушбу тайинловга қадар Абдужаббор Абдувоҳидов 2018 йил февралидан бери Ўзбекистон ташқи ишлар вазири ўринбосари, Жаҳон иқтисодиёти ва дипломатия университети ректори лавозимида фаолият кўрсатиб келаётган эди.
У 2002—2011 йилларда Тошкентдаги Халқаро Вестминстер университети ректори, 2011—2012 йилларда Жаҳон иқтисодиёти ва дипломатия университети ректори сўнгра, Президент ҳузуридаги Давлат бошқарув академияси ректори сифатида ишлаган.
Абдувоҳидов Давлат маслаҳатчиси лавозимида 2017 йил ноябридан буён ишлаб келаётган Рустам Қосимов ўрнини эгаллади. Айни вақтда, Рустам Қосимовнинг ўзи Рустам Комилов ўрнига Президентнинг бошқа — диний ишлар бўйича Давлат маслаҳатчиси этиб тайинланди (Комилов қайси лавозимга тайинлангани ҳозирча номаълум).
Бундан ташқари, Рустам Қосимов Президент ҳузуридаги Давлат бошқарув академияси ректори лавозимини ҳам сақлаб қолган. Бунгача у икки бор бош вазир ўринбосари, олий ва ўрта махсус таълим вазири (2005—2008, 2016—2017 йилларда), Жаҳон иқтисодиёти ва дипломатия университети ректори (2009—2011) бўлган.
Изоҳ (0)