Омон Абубакр Туркистоний: Ўзбекистон Саудия Арабистонини қишлоқ хўжалик маҳсулотлари билан тўла таъминлай олади

Қишлоқ хўжалиги вазирлигида Саудия Арабистонининг Aman Group Marketing компанияси раҳбари Омон Абубакр Туркистоний билан учрашув бўлиб ўтди. Унда қишлоқ хўжалиги соҳасида ўзаро самарали ҳамкорлик масалалари муҳокама қилинди. Бу ҳақда «Дарё»га Қишлоқ хўжалик вазирлиги матбуот хизмати маълум қилди.

—Бизнинг компания мева-сабзовот маҳсулотлари ва қайта ишланган маҳсулотларни Саудия Арабистони ва Форс кўрфазининг бошқа мамлакатларига импорт қилишда катта тажрибага эга. Ҳозирга қадар Саудия Арабистонининг қишлоқ хўжалик маҳсулотларига бўлган эҳтиёжларини Туркия, Миср, Сингапур, Судан, Эфиопия, Кения каби давлатлар билан алоқалар эвазига қондириб турибмиз. Сўнгги пайтларда юртингизда хорижий инвесторларга яратилаётган шароитлар, эркин савдо-сотиқ учун кенг имкониятлар яратилаётгани ҳақида хабаримиз бор. Айнан шу сабаб Ўзбекистон билан ишлашни мақсад қилганмиз.

Aman Group Marketing Ўзбекистонга бир эмас, бир неча йирик Саудия компанияларининг вакили сифатида ташриф буюрган. Яқин кунларда биз юртингизда ўз ваколатхонамизни очамиз. Бу ваколатхона Ўзбекистон бозорини ўрганиб, Саудия Арабистони компаниялари учун ҳисоботлар тақдим этиб боради. Пировард натижада ўзаро ҳамкорликни янги босқичга олиб чиқади. Ишонамизки, Ўзбекистон Саудия Арабистонининг қишлоқ хўжалик маҳсулотларига бўлган эҳтиёжларини тўла қоплай олади. Шунингдек, қишлоқ хўжалигининг алоҳида йўналиши — седана етиштириш бўйича ҳам ҳамкорлик истиқболларини айнан Ўзбекистонда кўрмоқдамиз, — деди Омон Абубакр Туркистоний

Қишлоқ хўжалиги вазирлиги вакили Абдумалик Намозов меҳмонларни Ўзбекистондаги инвестицион муҳит, яратилган шароитлар, ҳамкорликни бошқа йўналишлари ҳақидаги маълумотлар билан батафсил таништирди.

—Айни пайтда Россия, Қозоғистон, Жанубий Корея ва Хитойга қишлоқ хўжалик маҳсулотлари катта миқдорда экспорт қилинмоқда. Ўзбекистон қуритилган ва хўл ўрик экспорти бўйича дунёда 2-, 3-ўринларда туради. Хурмо экспортида  3, майиз борасида 4, гилос ва олхўри экспорти бўйича дунёда 5-ўринда туради. Қишлоқ хўжалигига инвестиция киритувчилар учун қатор қулайликлар мавжуд бўлиб, улар инвестиция ҳажмига кўра 3 йилдан 10 йилгача барча солиқлардан, шунингдек экспорт божларидан озод этилади, — таъкидлади Абдумалик Намозов.

Учрашув давомида мева-сабзовот маҳсулотларини сақлаш ва экспорт қилишга ихтисослашган логистика марказини қуриш, қўйчиликка ихтисослашга йирик чорва комплексини бунёд этиш масалалари ҳам муҳокама қилинди.