Тошкент ҳаётидаги сўнгги янгиликлар ҳақида янги сайт ишга туширилмоқда

Тошкент шаҳар ҳокимлиги Матбуот хизмати янги www.xn--tshkentnews-yij.uz сайтини ишга туширмоқда. Пойтахт, унинг ижтимоий-иқтисодий ҳаётидаги сўнгги янгиликлар ҳақида 9 та бўлим орқали маълумотга эга бўлиш мумкин. Барчаси тезкор ва информацион форматда. Бу ҳақда Тошкент шаҳар ҳокимлиги Матбуот хизмати хабар бермоқда.

Биринчи бўлим — «Тошкент». Бу ерда пойтахтда бўлаётган сўнгги ўзгаришлар, унинг меъморий ансамбли, бўлиб ўтаётган қизиқарли воқелар, акция ва кутилаётган тадбирлар ҳақида тўлиқ маълумотга эга бўлиш мумкин.

Шунингдек бу ҳақда «Ўзбекистон» бўлими орқали ҳам танишиш мумкин.

«Обод маҳалла» — сайтнинг махсус бўлими. Ушбу бўлимда пойтахтдаги ободонлаштириш ва кўкаламзорлаштириш ҳақида сўнгги янгиликлар, давлат дастури доирасида амалга оширилаётган ишлар, қайси маҳаллалар янги қиёфага кирганлиги ва қайсилари навбатда турганлиги тўғрисида маълумотлар жойлаштирилиб борилади.

«Иқтисодиёт» — мазкур бўлим Тошкент шаҳрида яқин келажакда жорий этиладиган янги инвестицион лойиҳалар ҳақида маълумотлар беради.

«Жамият» — бу бўлим барча учун. Тошкентда содир бўлаётган сўнгги воқеликлар, дам олиш кунларида қаерларга бориш мумкинлиги, пойтахтда ўтказилиши кутилаётган акциялар ҳақидаги маълумотни айнан ушбу бўлимдан олинг.

«Сиёсат» — бу бўлимда Ўзбекистоннинг ички ва ташқи сиёсатида рўй бераётган сиёсий жараёнлар акс этади.

«Технология» — мазкур бўлим сизни юқори технологиялар ва IT соҳасидаги янги ишланма ва ғояларнинг қачон ва қандай амалиётга жорий этилиши билан таништириб боради.

Тошкентга келган меҳмон бориши лозим бўлган масканлар ҳақида эса «Туризм» бўлимида маълум қилиб борилади. Ушбу бўлимда пойтахтининг диққатга сазовор жойлари, дам олиш ва кўнгилочар масканлари ҳақида тўлиқ маълумот бериб борилади.

Спорт билан шуғулланувчи ўзбекистонликларнинг янги ғалабалари ҳақида «Спорт» бўлимидан маълумот олинг.

«Улар Тошкентда яшайди» — режалаштирилаётган бўлим бўлиб, у орқали пойтахтда истиқомат қилаётган оддий инсонлар, уларнинг меҳнати ва фаолияти сабаб, мамлакат ва пойтахтнинг ривожланиши учун хизмат қилаётган янгиликлар ҳақида маълумот оласиз.

Янги сайт ҳозирда синов режимида иш олиб бормоқда. Унинг қандай форматда бўлиши ҳақида ҳамма ўз таклифини бериши мумкин. Бу учун қайта алоқа ҳам мавжуд. Ўз таклифларингизни info@tashkentnews.uz электрон почтасига юборишингиз мумкин. Улар кўриб, ўрганиб чиқилади.