“Ўттизта давлат Украина учун хавфсизлик кафолатлари концепцияси устида ишламоқда” — НАТО бош котиби 

Ўттизта мамлакатдан иборат гуруҳ Украина учун хавфсизлик кафолатлари концепцияси устида ишламоқда. Бу ҳақда НАТО бош котиби Марк Рютте билан Россия-Украина тинчлик жараёни доирасидаги учрашув якунлари бўйича Fox News телеканалига берган интервьюсида маълум қилди.

“Сўнгги ойларда Буюк Британия бош вазири Кир Стармер ва Франция президенти Эммануэл Макрон бошчилигидаги Япония ва Австралияни ўз ичига олган 30 мамлакатдан иборат гуруҳ ушбу хавфсизлик кафолатлари устида ишламоқда”, деди у.

Бош котибнинг сўзларига кўра, АҚШ ҳам ушбу хавфсизлик кафолатлари тизимига қўшилиш истагини билдирган ва бу борада Вашингтоннинг роли яқин кунларда муҳокама қилинади.

Рюттенинг таъкидлашича, Трамп Россия президенти Владимир Путин билан мулоқот бошлаш орқали вазиятни “боши берк кўчадан олиб чиққан”, шу билан бирга Россияга “босим” ўтказган. Рюттенинг фикрича, кечаги учрашув “жуда муваффақиятли” бўлган.

Унинг таъкидлашича, Трамп Путин билан телефон орқали суҳбатда уни ҳали ўтказилиш жойи аниқланмаган уч томонлама учрашув олдидан Зеленский билан учрашишга кўндирган.

Шу билан бирга, Рютте Украинанинг НАТОга аъзолиги ҳозирги музокаралар мавзуси эмаслигини таъкидлаган.

“2024 йилги саммитдан бошлаб НАТОнинг расмий позицияси шундан иборатки, Украинанинг НАТОга қўшилиши ортга қайтмас йўлдир, аммо биз бу ерда НАТОга аъзоликни муҳокама қилмаяпмиз. Биз 5-моддага ўхшаш Украина учун хавфсизлик кафолатларини муҳокама қилмоқдамиз”, дея қўшимча қилди Рютте.

Шунингдек, у учрашувда Украинанинг ҳудудий ён беришлари масаласи муҳокама қилинмаганини билдирган.

18 август куни кечқурун Трамп Зеленский ва Европа етакчилари билан музокаралар ўтказди. Очиқ қисм ярим соатдан сал камроқ давом этди. Музокараларда НАТО бош котиби Марк Рютте, Еврокомиссия раҳбари Урсула фон дер Ляйен, Буюк Британия бош вазири Кир Стармер, Франция президенти Эммануэл Макрон, Германия канцлери Фридрих Мерц, Финляндия президенти Александр Стубб, Италия бош вазири Жорж Мелони иштирок этди.

Трампнинг ўзи учрашувни “жуда самарали” деб атади. Унинг сўзларига кўра, томонлар АҚШ билан келишилган ҳолда Европанинг турли давлатлари томонидан тақдим этиладиган Украина учун хавфсизлик кафолатларини муҳокама қилган.