Самарқанддаги дўконда газ портлаши оқибатида 18 яшар йигит ва 14 ёшли қиз ҳалок бўлди

Самарқанд шаҳридаги «Янгиобод» маҳалласида яшовчи оила дўкон юритиб келаётган эди. Бу ҳақда «Самаркандский вестник» хабар бермоқда.

Ўша куни она дўконни 14 яшар қизига қолдириб, ўғли билан бозорга кетади. Бироз вақт ўтгач, харидор кириб келади ва сигарета харид қилади. 18 яшар йигит сигаретани шу ернинг ўзида тутатиб олишни сўрайди. Ёқилган олов эса портлашга сабаб бўлади.

Танасининг 80 фоизидан ортиғи куйган йигит ва қиз республика шошилинч тиббий ёрдам илмий маркази Самарқанд филиалининг куйиш бўлимига ётқизилди. Бироқ шифокорларнинг уринишлари зое кетди.

Ўсмирннинг юраги фожиадан уч кун ўтиб тўхтади. Тўртинчи куни қиз ҳам вафот этди.

«Марказгазтаъминот» УК бош муҳандиси Х.Бобомуродовнинг сўзларига кўра, воқеа жойида экспертиза ўтказилди. Таҳлиллар шуни кўрсатдики, маиший газ трубалар коррозияга учрагани туфайли сизиб чиққан.

— Маҳалламиз ҳудудида шимолий тақсимлаш станциясидан ғишт заводигача газ трубалари ётқизилган, — дейди «Янгиобод» маҳалла фуқаролар йиғини раиси У.Пўлатов. — Шу ернинг ўзидан ёқилғи қуйиш шохобчаларига ҳам қувурлар тортилган. Барча қувурлар юк машиналар ўтувчи автомобиль йўли тагидан ўтган. Мутахассислар газ сизиб чиққан қувур тешигини топди. Дўкон газ тармоқларига уланмаганига қарамай газ тупроқ орқали, балки кемирувчилар инларидан ўтиб, хонада тўпланган. Ёқилган сигарета портлашга сабаб бўлган. Бу воқеадан сўнг «Биз порох устида яшаётгандаймиз», деб хавотирда қолдик. Ахир, исталган пайт исталган жойдан газ сизиб чиқиши мумкин-да.

Нашрда келтирилишича, воқеа жойи ҳудудидан кўплаб газ қувурлари ўтган. Тешик пайдо бўлган қувур Самарқанд ғишт заводларидан бирига тегишли. Уларда қоида бўйича олиб борилиши керак бўлган текшириш ишлари охирги марта қачон ўтказилгани номаълум. Демак, маҳаллада яшовчи деярли 100 кишининг хавфсизлигига кафолат йўқ.