Халқ таълими вазири ва унинг ўринбосарлари бизнес вакиллари билан учрашди

Халқ таълими вазирлигида жамоатчилик ва бизнес вакиллари билан учрашув ўтказилди. Бу ҳақда вазирлик матбуот хизмати маълум қилди.

Тадбирда Халқ таълими вазири Ш.Шерматов, вазир ўринбосарлари А.Умаров, С.Бобохўжаев, А.Саъдуллаев, жамоатчилик ва бизнес вакиллари З.Ҳошимов («Korzinka.uz»), Н.Оқилова (Nestle), Х.Мамасаидов («Dekos.uz»), У.Ишмухаммедов (IDP IELTS), М.Қосимов (Technoplaza) ва Б.Орифжонов (Paynet асосчиси) иштирок этди.

Учрашувда Халқ таълими вазирлиги ҳузурида жамоатчилик кенгашини ташкил этиш масаласи муҳокама қилинди. Бугунги кунда жамоатчилик фикрига алоҳида эътибор қаратилаётгани сабабли, шунингдек, илғор хорижий ва маҳаллий тажрибаларни инобатга олган ҳолда Халқ таълими вазирлиги ҳузурида Жамоатчилик кенгашини ташкил этиш истиқболлари кўриб чиқилди.

Учрашув якунида жамоатчилик кенгаши низомини ишлаб чиқишни бошлаш ва унинг фаолиятидаги устувор вазифаларни белгилаб олишга келишилди. Шунингдек, Президентининг «Давлат органлари ҳузурида жамоатчилик кенгашлари фаолиятини ташкил этиш чора-тадбирлари тўғрисида»ги қарорининг ўз вақтида бажарилиши ва долзарблигига алоҳида эътибор қаратилди.

Ҳозирда кўпгина давлат ташкилотларида жамоатчилик кенгаши фаолият кўрсатаётганини инобатга олиб, вазирлик раҳбарияти томонидан республика халқ таълими тизимидаги кенг қамровли вазифалар ва йиғилиб қолган муаммоларни бартараф этишда ортирилган тажриба асосида самарали иш механизмини ташкил қилиш лозимлиги қайд этилди.