Президент Шавкат Мирзиёев 19 август куни Покистон Штаблар бошлиқлари бирлашган қўмитаси раиси, генерал Саҳир Шамшод Мирзо бошчилигидаги делегацияни қабул қилди. Бу ҳақда Президент матбуот хизмати хабар берди.
Маълум қилинишича, меҳмон Шавкат Мирзиёевга Покистон бош вазири Шаҳбоз Шарифнинг саломи ва энг эзгу тилакларини етказган.
“Покистон бош вазирининг жорий йил февраль ойидаги Ўзбекистонга ташрифи давомида эришилган келишувларни амалга ошириш нуқтайи назаридан Ўзбекистон-Покистон кўп қиррали ҳамкорлик ва стратегик шериклик муносабатларини янада ривожлантириш масалалари муҳокама қилинди. Турли даражаларда ўзаро мулоқот ва алмашинувлар фаоллашгани мамнуният билан қайд этилди”, дейилади манбада.
Таҳлилга кўра, жорий йил бошидан икки давлат ўртасидаги товар айирбошлаш ҳажми 23 фоизга, юк ташиш 50 фоизга ошган. Карачи ва Лаҳор шаҳарларида савдо уйлари очилган. Тўғридан-тўғри авиақатновлар кўпайган.
Мулоқотда ҳарбий ва ҳарбий-техник соҳаларда, хавфсизликка замонавий таҳдид ва хатарларга қарши курашиш борасидаги амалий ҳамкорлик масалалари кўриб чиқилган.
Ўз навбатида трансафғон темир йўлини қуриш лойиҳаси бўйича имзоланган уч томонлама битимни тез фурсатда амалга оширишга алоҳида эътибор қаратилган.
Изоҳ (0)