Қозоғистоннинг Astana Motors компанияси раиси Нурлан Смағуловнинг берган маълумотларга қараганда, Ўзбекистонда Hyundai автомобилларини сотиш йўлга қўйилади, деб ёзмоқда «Kommersant.uz».
Фото: Google Images
«Биз Hyundai’нинг Ўзбекистондаги дистрибуциясини (маҳсулотни ишлаб чиқарувчидан истеъмолчига етказиш) зиммамизга олдик. Йирик иқтисодиёти, катта аҳолиси бўлган қўшни мамлакатга кириб келиш ва у ерда Жанубий Кореянинг энг нуфузли брендини тақдим қилиш — катта масъулият», — деди Смағулов Forbes Kazakhstan нашрига берган интервьюсида.
Astana Motors Ўзбекистоннинг экспорт учун ўз чегараларини очишини бир неча йиллардан буён кутиб келмоқда. Компаниянинг машиналарни йиғиш заводи аввал бошидан қўшни мамлакатларга автомобиль экспорт қилишни мўлжаллаб қурилган. 2017 йил кузда Ўзбекистонда тадбиркорлик соҳасини ислоҳ қилиш бошланган. Қозоғистонда ишлаб чиқарилган янги автомобиллар учун акциз солиғи уларнинг божхона нархининг 2 фоизи миқдоригача камайтирилган. Hyundai’нинг айнан қайси моделлари сотилиши ҳозирча маълум қилинмаган.
Аввалроқ Наманганда Hyundai юк машиналари ва автомобиллари, шунингдек, махсус транспорт воситаларини ишлаб чиқариш йўлга қўйилиши хабар қилинган эди.
Astana Motors Қозоғистон бозорида 11 та автомобиль брендининг (Hyundai, Subaru, BMW ва MINI, Rolls-Royce, Toyota, Lexus, Jaguar Land Rover, Volvo ва бошқалар) вакили сифатида фаолият олиб боради.
Astana Motors машиналари аллақачон Россияда сотилади, кейинчалик МДҲнинг бошқа мамлакатлари билан ҳам ҳамкорликни йўлга қўйиш кутилмоқда.
