Ўзбекистон Миллий матбуот марказида Соғлиқни сақлаш вазирлиги томонидан онкология хизматининг бугунги ҳолати, онкологик касалликларнинг олдини олиш ва барвақт аниқлаш, онкология хизматини янада ривожлантириш масалаларига бағишлаб матбуот анжуманида ўтказилди. Бу ҳақда вазирлик ахборот хизмати хабар берди.
Вазир Алишер Шодмоновнинг таъкидлашича, онкологик касалликлардан ҳимояланиш учун, «энг аввало, соғлом овқатланиш маданиятига риоя этиш зарур». Чунки, унинг сўзларига кўра, «онкологик касалликларнинг келиб чиқишига, аввало, нотўғри овқатланиш жиддий сабаб бўлмоқда».
«Яъни, таркибида инсон соғлиғи учун зарарли моддалари бўлган озиқ-овқат ва ичимликларни истеъмол қилиш саратонга олиб келиши замонавий илм-фанда тўлиқ тасдиғини топди. Бундай озиқ-овқатлар қаторига қизил гўшт, колбаса ва бошқа қайта ишланган маҳсулотлар, ёғли таомлар, шакар, тузни киритиш мумкин», — деди вазир.
Бундан ташқари, чекиш, ичиш, семизлик ҳам саратонни келтириб чиқарувчи омиллар сирасига киради. Соғлом турмуш тарзига тўла риоя этиш, белгиланган муддатларда тиббий кўрикдан ўтиш, болаларни юқумли касалликларга қарши ўз вақтида эмлатиш, жисмонан фаол бўлиш ҳам онкологик касалликларнинг олдини олишга ёрдам беради.
Қайд этишларича, вилоятлардаги онкология диспансерлари Республика ихтисослаштирилган онкология ва радиология илмий-амалий тиббиёт марказининг филиалларига айлантирилиб, 10 дан зиёд малакали олимлар ва етакчи мутахассислар вилоят филиалларига раҳбар этиб тайинлангач «ҳар бир вилоятда олдинлари қилинмаган энг мураккаб жарроҳлик амалиётлари муваффақиятли амалга оширила бошланган».
Онкология муассасаларини дори-дармон билан таъминлаш яхшиланди: яқин-яқингача онкологик беморларни дори-дармон билан таъминлаш бор-йўғи 26 фоизни ташкил этган бўлса, Президент Шавкат Мирзиёевнинг 2017 йил 4 апрелдаги қароридан сўнг онкология муассасаларини дори билан таъминлаш ҳозиргача уч баробарга ошган, йил охирига бориб деярли тўлиқ таъминланиши кўзда тутилган.
Аҳоли орасида онкологик касалликларнинг олдини олиш мақсадида сут бези ва бачадон бўйни саратони скрининг тадқиқотлари бошлаб юборилган. Сут бези саратонини эрта аниқлаш учун 13 та мобил, 16 та стационар маммографик ускуналар харид қилинмоқда. Қизилўнгач, меъда ва колоректал саратон бўйича Фарғона вилоятида тажриба тариқасида скрининг тадқиқотлари режалаштирилган.
Изоҳ (0)