Тошкент аҳолиси замонавий шаҳарсозлик тамойиллари, меъморий мерос ва шаҳар маданияти ҳақидаги бепул маърузалар ва муҳокамаларда иштирок этиши мумкин, деб ёзади «Газета.uz».
Июль ва август ойлари давомида «Стрелка» медиа, архитектура ва дизайн институти (Россия) Тошкент шаҳар ҳокимлиги ҳузуридаги Жамоатчилик кенгаши билан ҳамкорликда замонавий шаҳарсозлик тамойиллари ҳақидаги бепул маърузалар, музокаралар ва профессионал семинарлар сериясини ўтказади.
Тошкент аҳолиси ободонлаштириш шаҳар муҳитига қандай таъсир кўрсатиши, шаҳар транспорт тизимини қай тарзда хавфсиз қилиш мумкинлиги, шаҳар фестивалларини ташкил этиш зарурати ҳақида билиб олиши мумкин.
5 июль куни Strelka Architects бош директори ва архитектори Дарья Парамонова «Шаҳарга ижтимоий макон нега керак?» маърузаси билан чиқиш қилади. 6 июль куни антрополог Михаил Алексеевский Тошкентда ўтказилган тадқиқотлар натижаларини тақдим этади.
Санкт-Петербургни велосипедлаштириш бўйича эксперт Дарья Табачникова ва «Йўл ҳаракатини ташкил этиш маркази» директори ўринбосари Артур Шахбазян қулай транспорт тизимини ташкил этиш ҳақида сўз юритади. КБ Стрелка лойиҳалари раҳбарлари Алёна Жмурова ва Яна Козак дизайн-код нима эканлиги ва у шаҳар ташқи қиёфасига қандай таъсир кўрсатиши ҳақида ҳикоя қилади.
Маъруза ва воркшопларга кириш учун олдиндан рўйхатдан ўтиш лозим. Тадбирлар Central Park (Мирзо Улуғбек номидаги марказий боғ) ва «Илҳом» театрида бўлиб ўтади.
Изоҳ (0)