Ўзбекистонда 1 июлдан эски намунадаги паспортлар «бир парча қоғоз»га айланади. Тошкентда ҳозиргача 1,8 млнга яқин фуқаро янги биометрик паспорт олган

2018 йил 1 июлдан бошлаб Ўзбекистон фуқаросининг биометрик бўлмаган (эски намунадаги) паспортлари амал қилишни тўхтатади. Белгиланган муддатда паспортини алмаштиришга улгурмаган фуқаролар маъмурий жавобгарликка тортилади.

Шу муносабат билан, Тошкент шаҳар ИИББ фуқаролардан паспортларни вақтида алмаштиришни сўради. Ўз навбатида, аҳолига қўшимча қулайлик яратиш мақсадида Тошкент шаҳар ИИББ Миграция ва фуқароликни расмийлаштириш бошқармаси ва унинг туман бўлимлари 26 майдан эътиборан соат 08:00 дан хизмат кўрсатишни бошлаганини эълон қилди (истисно — пайшанба (профилактика куни), якшанба ва байрам кунлари).

Тошкент шаҳар ИИББ Ахборот мультимедиа марказидан маълум қилишларича, 26 май ҳолатига кўра пойтахтда 1,78 миллиондан зиёд фуқаро биометрик паспорт олган.

Жумладан, 25 май куни Халқлар дўстлиги майдонида 16 ёшга тўлган бир гуруҳ ўғил-қизларга фуқаролик паспортлари тантана равишда топширилган.