17 май куни жиноят ишлари бўйича Бойсун туман судининг Бойсун туманида очиқ сайёр суд мажлиси бўлиб ўтди. Жасур Худойбердиев раислигидаги судда хотини ва қайнсинглисини пичоқлаган У.А.нинг жиноят иши кўриб чиқилди.
Судланувчи У.А. 1986 йилда Термизда туғилган, тожик миллатига мансуб, Ўзбекистон фуқароси, маълумоти ўрта, вақтинча ишсиз, оилали, 1 нафар фарзанди бор. У 2006—2016 йиллар оралиғида қасддан баданга шикаст етказиш, ўғрилик ва ҳақорат қилиш моддалари бўйича олти марта жиноят содир этган. Улардан бештасида томонларнинг ярашганлиги ёки амнистия актига биноан жиноий жавобгарликдан озод қилинган.
У.А. 2016 йилда 1986 йилда туғилган Ш.А. билан турмуш қурган. Улар турли арзимаган нарсалардан жанжаллашиб юрган. Улар фарзандли бўлганидан кейин ҳам жанжаллар тўхтамайди. Ш.А. шаҳарда яшай олмаслигини айтиб Бойсун туманидаги онасининг уйига келади. 2018 йил март ойининг бошида У.А. ҳам қайнонасининг уйига келиб, хотини билан яшай бошлайди. 8 март куни У.А. хотинига «байрамни бирга нишонлаймиз», деб айтиб, спиртли ичимликлар сотиб олади. У.А.нинг суддаги кўрсатмасига кўра, у хотини билан бирга спиртли ичимлик истеъмол қилади, кейин эса ухлаб қолади. Соат 22:00 га яқин уйдаги шовқиндан уйғониб кетади. Хотини Ш.А. қайнонаси Г.М. ва қайнсинглиси С.М. билан тортишаётганини кўради. Бироз ўтгач унинг ўзи рафиқаси билан тортишиб қолади. Иккиси ҳам хона ичида гиламнинг устида турган ош пичоқни олишга ҳаракат қилиб, пичоқни икки қўллари билан ушлаб тортишади. У.А. Ш.А.нинг қўлидан пичоқни тортиб олмоқчи бўлган вақтида, ош пичоқнинг уч қисми унинг кўкрак қафаси ўрта қисмига бир маротаба бехосдан санчилиб кетган. Кейин У.А. хотинининг қўлидан пичоқни олиб, ташқарига югуриб чиқаётганида эшик олдида турган қайнсинглиси С.М.ни туртиб юборади ва қўлидаги пичоқнинг уч қисми С.М.га тегиб кетади.
12 март куни Ички ишлар вазирлиги сайтида ушбу жиноят ҳақида хабар берилди. Унда У.А. жанжал вақтида хотинининг, кейин эса уларни ажратмоқчи бўлган қайнсинглисининг кўкрагига пичоқ билан уриб жароҳат етказгани ёзилганди. Опа-сингиллар касалхонага ётқизилиб, У.А. қўлга олингани маълум қилинганди.
Ш.А.нинг суддаги кўрсатмалари ИИВ сайтида эълон қилинган хабарда берилган маълумотларга яқин. Унинг сўзларига кўра, турмуш ўртоғи У.А. билан 23:00 га яқин жанжаллашиб қолган ва унга «Сиз билан бошқа яшамайман» деб айтган. У.А. хотинини уриб, пичоқ билан аёлининг кўкрак қафаси ўрта томонига бир маротаба санчган, иккинчи маротаба пичоқни санчмоқчи бўлган вақтида Ш.А. иккала қўли билан пичоқни кескир жойини ушлаб қолган. Хонага синглиси С.М. кириб, «Нима сабабдан жанжаллашияпсизлар» деб айтганида, турмуш ўртоғи У.А. ўрнидан туриб югуриб ташқарига чиқиб кетган. Шундан сўнг онаси тез ёрдам чақирган.
Бойсун туман СТЭБнинг хулосасига кўра, Ш.А.нинг баданидаги ўнг томонлама кўкрак қафаси санчилиб кирувчи жароҳати, постравматик ва постгемарогик шокнинг ўрта даражаси, чап қўл биринчи бармоқ ва ўнг қўл биринчи ва иккинчи бармоқ ички соҳасидаги кесилган жароҳати, бош энса соҳасидаги юмшоқ тўқималарининг эзилиши каби тан жароҳатлари ўткир кесувчи жисм таъсири натижасида келиб чиққан бўлиб, ҳаёт учун ҳавфли бўлган оғир шикастланиш эканлиги аниқланган.
У.А. воқеа содир бўлган кун маст ҳолатда бўлгани, турмуш ўртоғи ва қайнсинглисига пичоқ билан тан жароҳати етказганида уларни ўлдириш нияти бўлмаганини, турмуш ўртоғи билан тортишиб турган вақтида бехосдан пичоқ санчилганлиги, қилган ишидан пушаймонлигини, оилавий шароити оғирлигини, жабрланувчининг даъвоси йўқлигини, нафақадаги ёлғиз онаси борлигини инобатга олиб, қонуний енгиллик беришни суддан сўради.
Ш.А. турмуш ўртоғи У.А. ундан кечирим сўраганини, унга нисбатан ҳеч қандай даъвоси йўқлигини, унга етказилган зарарларни тўлиқ қоплаганлигини инобатга олиб, унга нисбатан қонуний енгиллик беришни сўради.
Суд судланувчи У.А.нинг айбига иқрор ва пушаймонлигини, жабрланувчининг даъвоси юқлигини енгиллаштирувчи ҳолатлар, маст холатда жиноят содир этганлигини жазони оғирлаштирувчи ҳолатлар деб топди.
Суд У.А.га Жинояд Кодексининг 104-моддасининг 1-қисми билан 3 (уч) йил муддатга озодликдан маҳрум қилиш жазосини тайинлади. Шу тайинланаётган асосий жазони ўтамасдан туриб ҳам унинг хулқини назорат қилиш орқали тузатиш ва қайта тарбиялаш мумкин деган қатъий фикрга келиб, ЖКнинг 72-моддасига асосан шартли ҳукм қилиб, У.А.га нисбатан 1 (бир) йил синов муддати белгилади. У.А.нинг қамоққа олиш тарзидаги эҳтиёт чораси бекор қилиниб, дарҳол суд залидан қамоқдан озод қилинди.
Суд ҳукмида, шунингдек, Бойсун туман ИИБ ашёвий далилларни сақлаш хонасида сақланаётган Ш.А.га тегишли 1 дона кўйлак, С.М.га тегишли 1 дона кўйлак эгаларига қайтарилиши, воқеа жойидан олинган 1 дона хўжалик пичоғи йўқ қилиниши белгилаб қўйилди.
Изоҳ (0)