Тошкент шаҳрида йўл-патруль хизмати ходимларини мобил видеокамералар билан таъминлаш жараёни 2018 йилнинг сентябридан бошланиши кутилмоқда. Бу ҳақда Тошкент шаҳар ИИББ томонидан 17 май, пайшанба куни ўтказилган брифингда маълум қилинди.
ИИББ ахборот мультимедиа маркази бошлиғи ўринбосари Ирина Сайфутдинованинг маълум қилишича, «ушбу масала бўйича ишланмоқда, тегишли муддатлар белгиланган». «Сентябр ойидан бошлаб, ушбу янгилик апробациядан ўтказила бошлаши кўзда тутилган», — дея маълум қилди ИИББ вакиласи.
«Podrobno.uz» маълумотларига кўра, аввалроқ ИИББ бошлиғи ўринбосари Дониёр Тошхўжаев Тошкент шаҳри учун 2 мингдан зиёд шундай махсус қурилмалар харид қилиниши режалаштирилаётгани, Хитой, Жанубий Корея ва Ўзбекистондаги етказиб берувчи компаниялар таклиф қилаётган вариантлар кўриб чиқилаётганини маълум қилган эди.
Лойиҳа 2018 йил сентябридан бошлаб амалга оширилиши ҳақида бунгача, март ойида, ИИВ Йўл ҳаракати хавфсизлиги бош бошқармаси бошлиғи ўринбосари Эрали Бозоров ҳам таъкидлаб ўтган эди. «Ҳозирда ушбу масала устида ишлаяпмиз ва етказиб берувчиларни танлаяпмиз. Масала оддий эмас, изчил ўрганишни талаб қилади», — деганди бош бошқарма вакили.
Қайд этиш жоиз, Ўзбекистонда йўл-патруль хизмати ходимларини мобил видеокамералар билан таъминлаш ҳақида илк бор мамлакат Президенти Шавкат Мирзиёевнинг 2017 йил 11 июлдаги қарорида сўз борган эди. Ўшанда ИИВга уч ой муддатда ушбу масала бўйича ҳукуматга таклифлар киритиш ҳақида топшириқ берилган эди.
Шунингдек, Президент 2017 йил 22 декабрь куни Олий Мажлисга йўллаган Мурожаатномасида ҳам ушбу масалага тўхталиб, 2018 йилдан бошлаб ички ишлар органлари йўл-патруль ва пост-патруль хизматлари ходимларининг фуқаролар билан мулоқот жараёнини қайд этиш имконини берадиган видеокамералар билан таъминланишини маълум қилган эди.
«Бу тизим соҳадаги мавжуд таъмагирлик ва суиистеъмолчилик ҳолатларининг олдини олиш имконини беради», — деганди ўшанда Президент.
Изоҳ (0)