Тошкентда тележурналистларнинг камерасини синдириб ташлаш билан таҳдид қилган Тошкент шаҳар қўриқлаш бошқармаси ходимасига чора кўрилди. Бу ҳақда Тошкент шаҳар ИИББ томонидан 17 май, пайшанба куни ўтказилган брифингда маълум қилинди.
«Тошкент» телеканалидаги «Пойтахт йўлларида» кўрсатувининг Тошкент бозорларидаги автотураргоҳлар муаммоларига бағишланган ва 28 апрель куни эфирга узатилган лавҳасида кўрсатув ижодкорлари Архитектура ва қурилиш бошқармасига келганида, қўриқлаш бошқармаси ходимаси бўлган аёл журналистларга камераларини синдириб ташлаш билан таҳдид қилган эди.
«Ушбу ҳолат юзасидан хизмат текшируви ўтказилди, қўриқлаш бошқармаси ходимасига нисбатан жазо чоралари кўрилди», — деди Тошкент шаҳар ИИББ ахборот мультимедиа маркази вакили Ирина Сайфутдинова.
Айни вақтда, хизмат текширувини тўлақонли ўтказиш учун телеканалдан кўрсатувнинг баҳсга сабаб бўлаётган қисмига доир видеоёзувларни тўлиқ, монтаж қилингунга қадар ҳолатда тақдим этиш сўралган, бироқ видеоёзувлар тақдим этилмаган.
«Бунинг ўрнига бизга телевидениедан хат келиб тушди. Унда, жумладан, ИИББнинг хизмат текшируви билан бир вақтда телевидение томонидан кўрсатув ижодкорларининг хатти-ҳаракатлари этикага қанчалик мувофиқ экани юзасидан хизмат текшируви ўтказилгани билдирилган. Маълум бўлишича, журналистларнинг ҳаракатлари этикага мувофиқ эмас деб топилган ва уларга ҳам чора кўрилган», — дея маълум қилди ИИББ вакиласи.
ИИББ ахборот мультимедиа маркази раҳбари Бахтиёр Иноғомовнинг қўшимча қилишича, агар тележурналистлар ушбу вазиятда ҳақ бўлганида эди, катта эҳтимол билан, ҳақиқатни юзага чиқариш учун ҳам ИИББ томонидан сўралган ва кўрсатув видеоларининг монтаж қилинмаган шаклини тақдим этишдан ўзи манфаатдор бўларди.
«Тақдим этилмадими, демак, эфирга олиб чиқилган вазиятларгача ҳам уларнинг ўз айби билан яна қандайдир воқеа юз берганини истисно қилиб бўлмайди», — дея қўшимча қилди у.
Изоҳ (0)