Toshkentda telejurnalistlarning kamerasini sindirib tashlash bilan tahdid qilgan Toshkent shahar qo‘riqlash boshqarmasi xodimasiga chora ko‘rildi. Bu haqda Toshkent shahar IIBB tomonidan 17-may, payshanba kuni o‘tkazilgan brifingda ma’lum qilindi.
“Toshkent” telekanalidagi “Poytaxt yo‘llarida” ko‘rsatuvining Toshkent bozorlaridagi avtoturargohlar muammolariga bag‘ishlangan va 28-aprel kuni efirga uzatilgan lavhasida ko‘rsatuv ijodkorlari Arxitektura va qurilish boshqarmasiga kelganida, qo‘riqlash boshqarmasi xodimasi bo‘lgan ayol jurnalistlarga kameralarini sindirib tashlash bilan tahdid qilgan edi.
“Ushbu holat yuzasidan xizmat tekshiruvi o‘tkazildi, qo‘riqlash boshqarmasi xodimasiga nisbatan jazo choralari ko‘rildi”, — dedi Toshkent shahar IIBB axborot multimedia markazi vakili Irina Sayfutdinova.
Ayni vaqtda, xizmat tekshiruvini to‘laqonli o‘tkazish uchun telekanaldan ko‘rsatuvning bahsga sabab bo‘layotgan qismiga doir videoyozuvlarni to‘liq, montaj qilingunga qadar holatda taqdim etish so‘ralgan, biroq videoyozuvlar taqdim etilmagan.
“Buning o‘rniga bizga televideniyedan xat kelib tushdi. Unda, jumladan, IIBBning xizmat tekshiruvi bilan bir vaqtda televideniye tomonidan ko‘rsatuv ijodkorlarining xatti-harakatlari etikaga qanchalik muvofiq ekani yuzasidan xizmat tekshiruvi o‘tkazilgani bildirilgan. Ma’lum bo‘lishicha, jurnalistlarning harakatlari etikaga muvofiq emas deb topilgan va ularga ham chora ko‘rilgan”, — deya ma’lum qildi IIBB vakilasi.
IIBB axborot multimedia markazi rahbari Baxtiyor Inog‘omovning qo‘shimcha qilishicha, agar telejurnalistlar ushbu vaziyatda haq bo‘lganida edi, katta ehtimol bilan, haqiqatni yuzaga chiqarish uchun ham IIBB tomonidan so‘ralgan va ko‘rsatuv videolarining montaj qilinmagan shaklini taqdim etishdan o‘zi manfaatdor bo‘lardi.
“Taqdim etilmadimi, demak, efirga olib chiqilgan vaziyatlargacha ham ularning o‘z aybi bilan yana qandaydir voqea yuz berganini istisno qilib bo‘lmaydi”, — deya qo‘shimcha qildi u.
Izoh (0)