Арманистонда намойишчилар давлат муассасаларини қамал қилишга киришди. Мухолифат етакчиси мамлакатда инқилоб бошланганини эълон қилди
Арманистоннинг собиқ президенти Серж Саргсян номзоди бош вазир лавозимига илгари сурилишига қарши оммавий норозилик намойиши ўтказаётган мухолифат қатнашчилари Ереванда давлат муассасаларини қамал қилишга киришди. Бу ҳақда Meduza хабар бермоқда.
Намойишчилар бош прокуратура, ташқи ишлар вазирлиги ва давлат даромадлари қўмитаси биноларини ўраб олди. Ҳар бир бино олдида 10-15 киши турибди, улар кириш эшикларини тўсиб қўйган.
«Бутун республика бўйлаб норозилик акциялари, иш ташлашлар бўлиб ўтмоқда. Арманистонда инқилобий вазият юзага келди. Мен бахмал инқилоби бошланганини эълон қиламан», — деди Ереван марказидаги майдонда чиқиши чоғида мухолифат етакчиси Никол Пашинян.
17 апрель, сешанба куни Арманистон парламентида Серж Саргсяннинг бош вазир лавозимига сайланиши бўйича йиғилиш бошланди. Бино полиция томонидан ўраб олинган.
