Путиннинг жияни ўз бизнеси ва Навальнийга нисбатан ҳурмати ҳақида гапириб берди

Россия президенти Владимир Путиннинг жияни, Putin Consulting консалтинг компанияси асосчиси ва «Рус академик фонди» бошқаруви раиси Роман Путин «Ura.ru» агентлигига интервью берди.

У бизнесда анча камсуқум одам эканлигини айтиб, «биз олигархлар эмасмиз» деди. Шунингдек, инглиз тилидаги Wikipedia’да унга тегишли деб кўрсатилган яхта ва Калифорниядаги ер майдонини «Ғарбнинг гиж-гижлашлари» деб атади.

Роман Путиннинг бизнеси — консалтинг. Илгари Putin Consulting’нинг Лондонда офиси ҳам бўлган, аммо у ёпилган, шунингдек, потенциал шерикларининг лойиҳалари ҳам ёпилиб кетган. «Биз билан ишлашга қўрқишади», — деди Роман Путин.

У қариндоши Владимир Путин билан бир неча марта — тахминан беш марта кўришганини айтди. «У банд одамга айланганидан кейин, биз, қариндошлар уни чалғитмасликка ҳаракат қиламиз», — деди у.

Бундан ташқари, Роман Путин мухолифатчи Алексей Навальнийнинг позициясига қўшилмаса ҳам, инсон сифатида уни ҳурмат қилишини, чунки у ҳамма томондан унга босим ўтказилишига қарамай, ўз нуқтаи назарида қатъий туришда давом этаётганини айтди.