Таниқли журналист Муҳаммаджон Обидовнинг кетма-кет икки китоби чоп этилди ва ўқувчилар орасида тез тарқалди. Бу ҳақда «Дарё»га журналист Шарофиддин Тўлаганов маълум қилди.
Улар «Мен кўрган дунё» публицистик мақолалар тўплами ва таҳлилий очеркларни жамлаган «Буюк ипак йўлидаги Шинжон» китобларидир. Шу муносабат билан Алишер Навоий номидаги Ўзбекистон Миллий кутубхонасида уларнинг тақдимоти бўлиб ўтди. Унда Ўзбекистон Республикаси санъат арбоби Иброҳим Ғофуров, таниқли ёзувчи, филология фанлари доктори, профессор Хуршид Дўстмуҳаммедов, Ўзбекистон Миллий университети доценти Аҳмаджон Мелибоев, «Халқ сўзи» газетаси бош муҳаррири ўринбосари Шуҳрат Жабборов, Ўзбекистон давлат жаҳон тиллари университети доценти Назира Тошпўлатова ва бошқалар сўзга чиқиб, китоблар ҳақида, муаллифнинг ижодий фаолияти ва касбий маҳорати ҳақида сўзлади.
«Буюк ипак йўлидаги Шинжон» китобидан Шинжон-Уйғур автоном райони шаҳарлари, сўлим манзараси, инфратузилмаси, ишлаб чиқариш ҳудудлари, замонавий кўриниши, тарихий обидалари, таниқли инсонлари, маданий ҳаёти ҳақида мақолалар ва кундалик турмуши акс этган кўпгина ранг-баранг ва ёрқин суратлар ўрин олган. У тарихчи, адабиётшунос, тилшунос, диншунос олимлар, илмий тадқиқотчилар, туризм соҳаси вакиллари ва кенг китобхонлар оммасига мўлжалланган бўлиб, Шинжон-Уйғур автоном районининг бой маънавий ва маданий меросини тарғиб этишга кўмаклашади.
– Мазкур китобда мў’жизалар диёри бўлмиш Хитойнинг Буюк Ипак йўлида жойлашган Шинжон-Уйғур автоном райони ҳақида, бу ҳудуднинг тарихи, ўзига хос хусусиятлари, сиёсати, географик жойлашуви, маданияти ва иқтисодиёти, тараққиёт босқичлари, бу ерда истиқомат қилаётган турли миллат вакилларининг турмуш тарзи ва бошқа жиҳатлар хусусида қизиқарли маълумотлар берилган. Шунингдек, Ўзбекистон-Хитой ҳамкорлигининг истиқболли йўналишлари борасидаги таҳлилий фикрлар баён этилган, — деди Хуршид Дўстмуҳаммедов.
– Муҳаммаджон Обидовнинг ушбу рисоласида Шинжон маданияти, халқининг турмуш тарзи ҳақида маълумот берилган. Китобда бу ўлкага ислом динининг кириб келиши ва туркий хоқонларнинг ҳарбий юришлари натижасида икки минтақанинг бир-бирига яқинлантирган ришталари ҳақидаги тарихий манбалар ёритилган, — қайд этди Иброҳим Ғофуров.
Тақдимот иштирокчилари «Мен кўрган дунё» китобига киритилган публицистик мақолалар таҳлилий журналистиканинг ёрқин намунаси бўлиа олади ва у талабалар учун амалий қўлланма сифатида хизмат қилади, деб таъкидлади.
—Муҳаммаджон Обидовнинг «Мен кўрган дунё» китоби матбаачиликда ҳам янги саҳифа очди, — деди «XXI аср» газетаси бош муҳаррири Норқобил Жалил. — Унда телевидение орқали берилган долзарб мавзуларга бағишланган видеофильм, репортажлар сценарийсидан ташқари махсус DVD дискда тўрт соатли уларнинг видеотасвирдаги талқини ҳам илова қилинган. Бу китоб орқали ўқувчи энди томошабинга ҳам айланади.