Наманган шаҳрининг турли даҳаларида ичи китоб билан тўлдирилган китоб жавонлари пайдо бўлди. Бу ҳақда «Дарё» мухбири хабар бермоқда.
Шаҳар кенгаши депутати, тадбиркор Маъруфхон Мўминов наманганлик китоб ихлосмандлари билан биргаликда «Халқ кутубхонаси» деб номланган мазкур лойиҳага қўл урди.
— Ўзим депутат бўлиб сайланган ҳудудда шундай китоб жавонлари ўрнатишни режа қилгандим. Кейинчалик лойиҳани кенгайтириб, бутун шаҳар бўйлаб жами 500 та китоб жавони ўрнатишга қарор қилдик. Чунки бу ишнинг ижтимоий аҳамиятини англаб етган кўплаб ҳамфикрлар топилди, — дейди Маъруфхон Мўминов.
Китоб жавонларига «Бир китоб олинг, бир китоб қўйинг» деган шиор ёзиб қўйилган. Нашрларга эса «Китобни ўқинг, илм олинг, лекин қайтариб келишни унутманг» деган сўзлар битилган.
Мазкур жавонларни дастлаб ўзлари китоблар билан тўлдирадиган ғоя муаллифлари кейинчалик мутолаа қилувчилар ҳам турли адабиётларни келтиришига умид қилмоқда.
Изоҳ (0)