Ўзбекистон Ёшлар иттифоқи ва Республика ёш ижодкорлар кенгаши «Буюклар биз билан» видеороликлар танловини эълон қилди. Бу ҳақида Республика ёш ижодкорлар кенгаши хабар берди.
Ушбу танлов Алишер Навоийнинг 577 йиллиги ва Заҳириддин Муҳаммад Бобурнинг 535 йиллиги муносабати билан, уларнинг ижодини кенг тарғиб қилиш ва оилалар, корхона ва таълим муассасаларида уларнинг ижодий мероси билан яқиндан таништиришга иштиёқ уйғотиш мақсадида ташкил этилмоқда.
Танлов икки номинация бўйича ташкил қилинади — «Энг яхши ғазалхон оила» ва «Энг яхши ғазалхонлик кечаси».
«Энг яхши ғазалхон оила» номинациясида иштирокчилар ўз оила аъзолари билан биргаликда Навоий, Бобур ва бошқа ғазалнавис шоирлар ғазалларини ёддан ўқиб, тасвирга муҳрлаши лозим.
«Энг яхши ғазалхонлик кечаси» номинациясида олий ва ўрта махсус таълим муассасалари, умумий ўрта таълим мактаблари, мактабгача таълим муассасалари, меҳрибонлик уйлари, шунингдек, турли корхона ва ташкилотлар доирасида ўтказилган ғазалхонлик кечаларининг тасвири туширилган видеороликлар иштирок этиши мумкин.
Иштирокчилар танловда қуйидаги усуллар орқали қатнашишлари мумкин:
- видеороликларни Telegram мессенжеридаги @ijodkormatbuot профилига юбориш орқали;
- ижтимоий тармоқларда (Youtube, Facebook, Instagram, «Одноклассники») #buyuklar_biz_bilan, #yoshijodkor ҳештеглари остида қўйилган видеороликлар орқали. Бунда иштирокчилар видео учун ҳавола (линк) манзилини Telegram мессенжеридаги @ijodkormatbuot профилига юбориши тавсия этилади;
- CД ёки DVD дискларга ёзилган видеороликларни «100096, Тошкент шаҳар, Қатортол кўчаси, Маъмурий ҳудуд биноси, 60-Б уй» манзили бўйича Республика ёш ижодкорлар кенгашига юбориш орқали.
Танловда ғолиб деб топилган видеороликлар муаллифлари қуйидагича мукофотланади:
- 1-ўрин — замонавий компьютер жамланмаси;
- 2-ўрин — ноутбук;
- 3-ўрин — планшет.
Изоҳ (0)