Халқ таълими вазири ўринбосари самарқандлик 23 ёшли ўқитувчининг ўлими ҳақида: «Бас, етар! Ўқитувчиларни тинч қўйинг»

Ўзбекистон Халқ таълими вазири ўринбосари Алишер Саъдуллаев самарқандлик 23 ёшли ўқитувчининг ўлими юзасидан ўз фикрини билдирди.

«Халқимиз азалдан устозларни ардоқлаб келган. Илм тарқатувчиларга берилган эътибор ва эҳтиром Худо хоҳласа ўз натижасини беради, —деб ёзди вазир ўринбосари Facebook’даги саҳифасида. — Ҳар бир раҳбар мактабда ўқиган ҳамда устоз кўрган ва ишончимиз комил улар ҳам ўз устозларини ардоқлашади. Ҳали бу каби юмушларни инновация орқали енгиллаштириш ва катта ютуқларга эришиш мумкин. Бунинг учун фақат ўқитувчиларга бор имкониятни яратиб беришимиз зарур, шунда ўқитувчи эмас инновация бизга ечим бўлади. Иқтисодимиз гуллаб-яшнайди. Юртбошимиз ҳам халқимиз ғамида тиним билганлари йўқ. Худо хоҳласа, кунлар келиб бу кунларни эслаб юрамиз. Ҳар қандай ривожланган давлат ҳам таълим орқали ривож топган. Ҳамма дўстларимиздан бўлар-бўлмас гаплар эмас, холис ёндашилган кўмак ва талқин кутиб қоламиз».

«Бас, етар! Ўқитувчиларни тинч қўйинг. Ҳамма ўз ишини қилсин. Парламент аъзолари, депутатлар ва бошқа давлат органлари келинглар бирлашайлик. Миллат тақдири-ку ахир!» — дея хулоса қилди Алишер Саъдуллаев.

Эслатиб ўтамиз, Ўзбекистон Президенти Шавкат Мирзиёевнинг Самарқанд вилоятига ташрифи арафасида Каттақўрғон туманида кўча тозалаш ишларига жалб этилган 23 ёшли ўқитувчи автоҳалокатга учраб, вафот этди. Президент матбуот котиби Комил Алламжонов ҳолат юзасидан ўрганиш олиб борилаётгани ва «тегишли чоралар кўрилиши»ни маълум қилди.