2018 йилда Буюк Британия, Германия, Россия, АҚШ, Туркия, Чехия, Франция, Япония музейларида сақланаётган Ўзбекистон маданий меросига оид 20 жилдли китоб-альбом чоп этилади. Бу ҳақда «Ўзбекистон маданий мероси дунё тўпламларида» лойиҳасининг 2018 йилги режаларига бағишланган медиа-форумда маълум қилинди, дея хабар беради ЎзЕОВМА.
Шунингдек, жорий йилда Алишер Навоий ижодига мансуб қўлёзмалар (Буюк Британия кутубхонаси, Франция миллий кутубхонаси), Кастилия қиролининг элчиси Руи Гонсалес де Клавихонинг «Темур саройига юборилган элчи» китоби (Испания миллий кутубхонаси), «Зафарнома» асарининг қадимий қўлёзмаси (Буюк Британия кутубхонаси), «Катта Лангар Қуръони», Ҳусайн Бойқаро девони, «Равзат-ус-cафо», «Темур тузуклари» (Россия Фанлар академияси Шарқ қўлёзмалари институти), Абу Али ибн Сино асарларининг қадимий қўлёзмаларини босқичма-босқич рақамли форматга ўтказиш ва уларнинг факсимиле-нусхаларини чоп этиш каби чора-тадбирлар кўзда тутилган.
Айни пайтда лойиҳа доирасида чоп этилган китоб-альбомлар, ҳужжатли фильмларнинг 10 минг нусхасини маҳаллий ва дунёдаги нуфузли кутубхоналар, олий таълим даргоҳлари, мамлакатга ташриф буюрувчи хорижий делегациялар аъзоларига тақдим этиш кўзда тутилган.
Форум давомида Ўзбекистондаги 16 та музей, кутубхона, илмий муассаса ва ташкилотларга «Катта Лангар Қуръони» ва «Девони Ҳусайний» асарлари қўлёзмаларининг факсимиле-нусхаларини олиш ҳуқуқини берувчи сертификатлар топширилди. Бир қатор йирик кутубхона ва музейлар, маърифий-илмий масканларга лойиҳа доирасида чоп этилган 10 жилдли тўпламлар топширилди.
Изоҳ (0)