«Базель» бир мавсумда Манчестернинг икки жамоасини таслим қилди. «Сити» бунгача ўз уйида мағлуб бўлмаганди

Швейцариянинг «Базель» футбол клуби Чемпионлар Лигаси билан хайрлашди. Бу орада клуб Манчестер шаҳрининг икки клубини таслим қилишга эришди.

Гуруҳ босқичида жамоа «Манчестер Юнайтед» билан тўқнаш келган бўлиб, «Олд Траффорд»да 0:3 ҳисобида имкониятни бой берган, ўз майдонида эса 1:0 ҳисобида зафар қучганди. Нимчорак финалга «Базель» Хосеп Гвардиола мураббийлик қиладиган «Манчестер Сити»га рақиб бўлди. Томонларнинг Швейцарияда кечган илк ўйинида «шаҳарликлар» йирик ғалабага эришди — 4:0. Такрорий ўйинда эса швейцарияликлар устун келди — 2:1.

Бу «Манчестер Сити»нинг шу мавсум ҳисобидан илк уй мағлубияти бўлди. Бунгача қуйи лиганинг «Уиган» клуби «Сити»ни 1:0 ҳисобида таслим қилиб, Англия Кубогидан чиқариб юборган, АПЛда эса «Ливерпуль» рақибидан 4:3 ҳисобида устун келганди. Шунингдек, Чемпионлар Лигасининг гуруҳ босқичидан жой олган ва манчестерликлар учун ҳеч қандай аҳамият касб этмайдиган ўйинда «Шахтёр» ҳам Пеп шогирдларини ютганди. «Базель»га қарши беллашувда «манкунианлар» биринчи ўйиндаги йирик ҳисобга ишониб ҳаракат қилди.

Шунингдек, Гвардиола Эдерсон, Компани, Отаменди, Уокер, де Брюйне, Давид Силва, Серхио Агуэро, Фернандиньо каби асосий таркиб футболчиларини майдонга туширмади.

Европа Чемпионлар Лигасининг чорак финалига ҳозирча «Реал», «Ливерпуль», «Ювентус» ва «Манчестер Сити» клублари йўл олди.

Чемпионлар Лигаси Нимчорак финал 7 март, чоршанба

«Манчестер Сити» — «Базель» 1:2