Пхёнчхан мезбонлик қиладиган қишки Олимпиада расман очиқ деб эълон қилинди (фото+видео)

Жанубий Корея президенти Мун Чжэ Ин XXIII қишки Олимпиада ўйинларини очиқ деб эълон қилди.

Жанубий Корея ўз тарихида илк бор қишки Олимпиада ўйинларинини қабул қилмоқда. Бунгача 1988 йилда Сеулда ёзги Олимпиада бўлиб ўтган. Амалдаги мезбон Пхёнчхан ушбу ҳуқуқни учинчи уринишдагина қўлга киритган: дастлаб улар 2010 йилда мезбонлик имкониятни Ванкуверга, 2014 йилда Сочига бой бериб қўйган.

16 кун давом этиши белгиланган қишки Олимпиадада 15 спорт тури бўйича 102 та медаллар тўплами учун кураш олиб борилади.

Беллашувларда жами ҳисобда 92 давлатдан 2952 спортчи қатнашади. Пхёнчхан Олимпиадасида иштирок этувчи давлатлар ва спортчилар сони қишки Олимпиадалар учун рекорд кўрсаткич ҳисобланади. Пхёнчханга энг кўп спортчи билан келган терма жамоа АҚШдир. Америкадан қишки Олимпиадага 242 нафар спортчи келган.

[/video]

Қишки Олимпиадада Ўзбекистон шарафини икки спортчи ҳимоя қилади. Комил Тўхтаев аллақачон олимпия шаҳарчасига етиб келган бўлса, айни пайтда АҚШда ўқув-машғулот йиғинларини давом эттираётган Миша Ге Жанубий Кореяга 11 февраль куни етиб боради.

Ге 16 февраль куни Gangneung Ice Arena муз саройида фигурали учишнинг қисқа дастурида чиқиш қилади, 17 февралда эса эркин дастурда ўз омадини синаб кўради.

Комилжон Тўхтаев 18 февраль куни тоғ чанғисининг гигант слалом баҳсларида иштирок этади. 22 февралда уни слалом бўйича мусобақа кутиб турибди. Тоғ чанғиси бўйича беллашувлар Yongpyong Alpine Centre мажмуасида бўлиб ўтади.