Қорақалпоғистон Республикаси божхона бошқармаси ҳамда ҳуқуқни муҳофаза қилувчи бошқа идоралар вакиллари томонидан ўтказилган тезкор-қидирув тадбирлари давомида бир нечта фуқароларнинг қурол-яроғларни ноқонуний сақланаётганлиги аниқланди. Бу ҳақда Давлат божхона қўмитасининг матбуот хизматига таяниб, ЎзА хабар берди.
Жумладан, Нукус туманида фуқаро Қ.Д.нинг хонадони унинг розилиги билан холислар иштирокида кўздан кечирилди ва ҳовлисининг орқа томонида жойлашган молхонаси ёнидаги қамишлар орасида 2 дона ов милтиғи, 23 дона гилза, 34 дона пистонларни ноқонуний равишда сақланаётганлиги аниқланган. Маълум бўлишича, фуқарода қуролларни сақлаш бўйича ҳеч қандай ҳужжат бўлмаган.
Шунингдек, Қўнғирот туманида ўтказилган тезкор тадбир натижасида, А.А.нинг хонадонидан калибри 16 миллиметр бўлган 1 дона бир стволли ов милтиғи ва 3 дона гилзаларни ноқонуний равишда яширган ҳолда сақлаб қуйганлиги аниқланди. Кегейли туманида истиқомат қилувчи фуқаро А.Т.нинг хонадони ҳам амалдаги тартибларга мувофиқ кўздан кечирилганда, бу ерда 1 дона икки стволли ов милтиғи ҳеч қандай ҳужжатларсиз сақлаётганлиги фош бўлди.
Қорақалпоғистон темир йўл станциясида «Волгоград—Тошкент» йўловчи поезди божхона кўригидан ўтказилганида фуқаро Б.П. йўловчи божхона декларациясида кўрсатилмаган 9 килограмм ов милтиғининг дробларини ноқонуний равишда Россиядан Ўзбекистонга олиб келаётганлиги аниқланди.
Мазкур ҳолатлар юзасидан ҳуқуқбузарларга нисбатан суд томонидан тегишли жазо чоралари қўлланилди.
Қорақалпоғистон Республикаси божхона бошқармаси ва бошқа ҳуқуқни муҳофаза қилувчи орган ходимлари билан ҳамкорликда олиб борилган чора-тадбирлар натижасида 2017 йил давомида 6 та ўқ отар қурол, 15 дона ўқ, 103 дона гилза, 10 килограмм дроб, 2124 дона пистон, 26 грамм порох, 496 дона пневматик патронлар, 912 дона пневматик ўқлар пистони, 1 дона газбаллонли тўппонча, 13 дона электрошокерлар далилий ашё тариқасида олиб қўйилган.
Изоҳ (0)