Европада аномал совуқ об-ҳаво оқибатида 10 киши ҳалок бўлди

Европа мамлакатларида 27 февраль, сешанба куни ҳам қалин қор ва совуқ об-ҳаво сақланиб қолмоқда, деб хабар беради «Интерфакс».

Буюк Британия

Буюк Британия метеорология хизмати об-ҳаво ҳаёт учун хавфли бўлиши мумкинлиги ҳақида огоҳлантирди. Мамлакатнинг айрим ҳудудларида 40 сантиметр қалинликда қор ёғиши кутилмоқда.

Ноқулай об-ҳаво шароити туфайли юзлаб поездлар ҳаракати тўхтатилган, ўнлаб авиарейслар кечиктирилган.

British Airways авиакомпанияси Хитроу ва Гатвик аэропортидан 68 та рейснинг бекор қилингани ҳақида маълумот берди.

Франция

Франция ҳудудининг катта қисмида об-ҳавонинг кескин совиши натижасида «совуқ» режаси ҳаракатга келтирилган. Совуқ об-ҳаво оқибатлари билан курашиш бўйича режа доирасида ҳукумат томонидан беш мингдан ортиқ уйсиз фуқаролар вақтинча яшаш жойи билан таъминланди.

Кўрилаётган чора-тадбирларга қарамай Франциядаги совуқ қурбонлари сони уч кишига етган. Европадан уч кун давом этган совуқ оқибатида камида ўн киши ҳалок бўлган. Улардан тўрт нафари Польшада, яна уч нафари Литвада вафот этган. Франция соҳилларида олти соат мобайнида қор ёққан.

Испания ва Италия

Испаниянинг Каталония шаҳрида 26 февраль, душанба куни кечқурун қор ёға бошлаган. Маҳаллий аҳоли йўлларда ҳаракат чекланиши билан боғлиқ муаммога дуч келди. Вик университетидаги машғулотлар бекор қилинган.

Рим шаҳрида икки кундан бери мактаб ва болалар боғчалари ишламаяпти. Автобус ва трамвайлар қийинчилик билан ҳаракатланмоқда. Поездлар эса манзилга кечикмоқда. Минглаб йўловчилар бир неча соат давомида совуқ ва қалин қор туфайли йўлда тўхтаб қолган поездларни тарк эта олмаяпти.

Италия жанубига ҳам қалин қор ёғгани айтилмоқда. Хусусан, Неаполь шаҳрига қалин қор ёғган, Везувий вулқонининг чўққиси қор билан қопланган.

Неаполь шаҳри мэри Луижи де Мажистрис болалар боғчалари ва мактабларни ёпиш ҳақида кўрсатма берган. Шаҳар транспорти ҳаракатида муаммолар юзага келган, аэропорт ўз ишини тўхтатган.