Германиялик шаҳзода қамоқдан дам олишга чиқиб, меҳмонхона томидан қулаб ўлди

Германиялик шаҳзода, Гогенцоллернлар сулоласи вакили Карлос Патрик Годхард Франкфуртда 39 ёшида вафот этди, деб хабар беради Daily Mail.

Қайд этилишича, шаҳзода Intercontinental меҳмонхонасининг 21-қаватида жойлашган даҳлиз томидан қулаб вафот этган. У ҳодиса жойида ҳалок бўлган.

Айнан нима юз бергани номаълум, бироқ шаҳзода ўз жонига қасд қилган бўлиши мумкинлиги тахмин қилинмоқда. Ҳолат юзасидан гумондорлар қидирилмаяпти.

Хабарда айтилишича, Карлос Патрик Годхард фирибгарлик учун тўрт йиллик қамоқ жазосини ўтаётган бўлган. Ўша куни уни дам олишга чиқаришган эди. Қамоқ муддати жорий йилнинг июль ойида тугаши керак эди.

Шаҳзода Карлосга санъат асарлари коллекционери бўлган отасидан кўп миллионлик мерос қолган. 2014 йилда у мавжуд бўлмаган жамғармалар билан иш олиб боргани учун қамалган эди.