Озарбайжон раҳбари Илҳом Алиев томонидан мамлакатда навбатдан ташқари президентлик сайлови ўтказилиши белгиланишига, жумладан, халқаро тадбирлар ўтказилиши сабаб бўлди. Бу ҳақда давлат раҳбарининг ташқи сиёсий масалалар бўйича ёрдамчиси Али Ҳасанов маълум қилди, дея хабар беради «РИА Новости».
«Олдинроқ сайлов 17 октябрга белгиланганди. Бироқ май ойидан бошлаб мамлакатда халқаро даражадаги нуфузли тадбирлар ўтказилади. Бу Озарбайжон демократик республикаси ташкил топганининг 100 йиллиги доирасидаги тадбирлар, Халқаро гуманитар форум.Уларнинг аксарияти йил охирига режалаштирилган ва сайлов билан бир вақтга тўғри келиши мумкин», — дейилади Ҳасановнинг баёнотида.
Мансабдор навбатдан ташқари сайлов ўтказилиши конституция ва мамлакатнинг бошқа қонунчилик ҳужжатлари талабларига тўлиқ мувофиқ келишини таъкидлади.
«Олдинроқ Конституцияга давлат раҳбари ваколатларини 5 йилдан 7 йилгача узайтириш ҳақида ўзгариш киритилганди. Шу сабабли президентга сайловчиларга ишонч вотуми учун мурожаат этиш, яъни навбатдан ташқари сайлов ўтказиш ҳуқуқи тақдим этилди», — изоҳ берди Озарбайжон президенти ёрдамчиси.
Эслатиб ўтамиз, Озарбайжонда навбатдан ташқари президентлик сайлови ўтказилиши 11 апрелга белгиланди.
Изоҳ (0)