Ozarbayjon rahbari Ilhom Aliyev tomonidan mamlakatda navbatdan tashqari prezidentlik saylovi o‘tkazilishi belgilanishiga, jumladan, xalqaro tadbirlar o‘tkazilishi sabab bo‘ldi. Bu haqda davlat rahbarining tashqi siyosiy masalalar bo‘yicha yordamchisi Ali Hasanov ma’lum qildi, deya xabar beradi “RIA Novosti”.
“Oldinroq saylov 17-oktabrga belgilangandi. Biroq may oyidan boshlab mamlakatda xalqaro darajadagi nufuzli tadbirlar o‘tkaziladi. Bu Ozarbayjon demokratik respublikasi tashkil topganining 100 yilligi doirasidagi tadbirlar, Xalqaro gumanitar forum.Ularning aksariyati yil oxiriga rejalashtirilgan va saylov bilan bir vaqtga to‘g‘ri kelishi mumkin”, — deyiladi Hasanovning bayonotida.
Mansabdor navbatdan tashqari saylov o‘tkazilishi konstitutsiya va mamlakatning boshqa qonunchilik hujjatlari talablariga to‘liq muvofiq kelishini ta’kidladi.
“Oldinroq Konstitutsiyaga davlat rahbari vakolatlarini 5 yildan 7 yilgacha uzaytirish haqida o‘zgarish kiritilgandi. Shu sababli prezidentga saylovchilarga ishonch votumi uchun murojaat etish, ya’ni navbatdan tashqari saylov o‘tkazish huquqi taqdim etildi”, — izoh berdi Ozarbayjon prezidenti yordamchisi.
Eslatib o‘tamiz, Ozarbayjonda navbatdan tashqari prezidentlik saylovi o‘tkazilishi 11-aprelga belgilandi.
Izoh (0)