Ўзбекистон Президенти Шавкат Мирзиёевнинг қизи Шаҳноза Шавкатовна Мирзиёева Мактабгача таълим вазирлигининг Мактабгача таълим муассасалари фаолиятини ташкил этиш бошқармаси бошлиғи ўринбосари сифатида ишламоқда. Бу ҳақда вазирликнинг янги ишга тушган MDO.uz сайтида ахборот берилган.
Шаҳноза Шавкатовна бошқармада Елена Теннинг ўринбосари сифатида фаолият олиб бормоқда. Мазкур бошқарма давлат, нодавлат ва муқобил кўринишдаги болалар боғчалари фаолиятини ташкил этиш билан шуғулланади.
Вазирлик сайти дастлабки синов босқичида рус тилида ишга тушган бўлиб, яқин вақт ичида сайтнинг ўзбек тилидаги муқобили ҳам тўлиқ қувват билан иш бошлаши кутилмоқда.
Сайтда вазирликнинг ташкилий тузилмаси, раҳбар шахслари, шунингдек, мактабгача таълим соҳасидаги сўнгги янгиликлар ҳақида ахборот берилган.
Маълумот учун, Шаҳноза Мирзиёева Президент Шавкат Мирзиёевнинг кенжа қизидир.
Ўзбекистон Мактабгача таълим вазирлиги Ўзбекистон Президенти Шавкат Мирзиёевнинг 30 сентябрдаги фармонига мувофиқ ташкил этилган. Агриппина Шин вазирлик раҳбари этиб тайинланган.
Вазирликнинг асосий вазифалари этиб Ўзбекистонда ўзаро рақобатдош давлат ва нодавлат мактабгача таълим муассасалари тармоғини яратиш орқали болаларнинг мактабгача таълим муассасалари билан қамраб олиниш ҳажмини ошириш, шунингдек, амалиётга мактабгача таълим ва болаларни тарбиялашнинг муқобил воситаларини жорий этишдир.
Бундан ташқари, замонавий технологиялар ва методлар ёрдамида раҳбарлар ва педагогик кадрларни қайта тайёрлаш, шунингдек, болаларга ғамхўрлик қилиш учун муносиб шароитлар яратиш кўзда тутилган. Вазирлик бу йўлда Жанубий Корея тажрибасини Ўзбекистонда татбиқ этишни режалаштирмоқда.
Изоҳ (0)