Ўзбекистон Президентининг 2018 йил 16 январдаги 5303-сон Фармони билан 2019 йил 1 январига қадар божхона тўловлари тўлашдан озод қилинадиган (божхона расмийлаштируви учун йиғимлар бундан мустасно) озиқ-овқат маҳсулотлари ва хом ашёларнинг айрим турлари рўйхати тасдиқланди, деб хабар берди Norma.
Унга 8 номдаги товарлар киритилди (қавсда ТИФ ТН бўйича кодлари кўрсатилган):
- тирик йирик қорамол (0102);
- тирик қўй ва эчкилар (0104);
- йирик қорамол гўшти, барра ёки совутилган (0201);
- барра, совутилган (музлатилганидан ташқари) қўй ёки эчки гўшти (0204);
- соя ловияси, майдаланган ёки майдаланмаган (1201);
- кунгабоқар уруғи, майдаланган ёки майдаланмаган (1206 00);
- кунжут уруғи (1207 40);
- шакарқамиш ёки лавлаги шакари ва кимёвий тоза сахароза, қаттиқ ҳолатда (1701).
Импорт. Ўзбекистонга юқорида санаб ўтилган товарларни олиб келишда «нол» ставка бўйича импорт божхона божи солинади. Улардан аксиз солиғи ундирилмайди. Қўшимча қиймат солиғи 20%ни ташкил этади. Божхона расмийлаштируви учун йиғим божхона қийматининг 0,2%ини, бироқ камида $25 ва кўпи билан $3 000 ни ташкил этади (йиғимни тўлаш мажбурияти сақланиб қолади).
Экспорт. Ўзбекистонда 1997 йилдан бошлаб экспорт божхона божлари бекор қилинган. Кўрсатилган товарлардан аксиз солиғи ундирилмайди. Товарларни экспортга реализация қилишга «нол» ставка бўйича ҚҚС солинади. Божхона расмийлаштируви учун йиғим божхона қийматининг 0,1%ини, бироқ камида ЭКИҲнинг 50%ини ташкил этади (йиғимни тўлаш мажбурияти сақланиб қолади).
Эслатиб ўтамиз, тирик чорва моллари, гўшт ва шакарни экспорт қилиш Президент ёки Ҳукумат қарорлари асосида амалга оширилади.
Ҳужжат қонун ҳужжатлари маълумотлари миллий базасида расман эълон қилинган ва 2018 йил 17 январда кучга кирди.
Изоҳ (0)