Бугунги кунда Ўзбекистон гилос етиштириш ва унинг экспорти бўйича АҚШ, Чили, Италия, Туркиядан кейин 5-ўринни эгаллайди. Бу ҳақда «Халқ сўзи» газетаси ёзиб чиқди.
Маълумотларга қараганда, айни пайтда мамлакатдаги гилосзорлардан йилига 200 минг тоннадан зиёд ҳосил олинади. Унинг 30 минг тоннадан ортиғи хорижга жўнатилмоқда.
«Хўш, бу камми ёки кўп? Имкониятларни янада кенгайтириш, жаҳон бозоридаги ўрнимизни мустаҳкамлаш учун яна нималар қилиш лозим?», — деб савол беради муаллиф.
«Ўзагроэкспорт» акциядорлик жамиятининг харидлар бўйича директори Баҳодир Раҳматуллаевнинг таъкидлашича, бунинг учун, аввало, мева етиштириш ва қайта ишлашга ихтисослаштирилган ҳар бир корхона ташқи бозорга кириш ҳуқуқини берувчи Global GAP сертификатига эга бўлиш шарт. Ҳозирги кунда республикада мева-сабзавот экспорти билан шуғулланувчи 10 дан ортиқ субъект шундай сертификатни қўлга киритган. Етиштирилаётган гилосга талаб катта.
Соҳага инновацион технологиялар изчиллик билан жорий этилаётгани натижасида жойларда интенсив боғлар барпо этилиб, ҳосилни Европа андозаларида қайта ишлаш ва қадоқлаш йўлга қўйилмоқда. Масалан, Италиянинг «Унитекс» компаниясидан келтирилган линия ёрдамида соатига 4 тонна маҳсулотни саралаш, табиий хусусиятлари ва ташқи кўринишини сақлаб қолган ҳолда музлатиш ва қадоқлаш мумкин. Мазкур йўналишдаги саъй-ҳаракатлар натижасида 2018–2019 йиллар мобайнида гилос экспорти 50 минг тоннага етказилади. Яқин беш йилликда эса 100 минг тонналик маррани эгаллаш мўлжалланмоқда.
Наманган вилояти Тўрақўрғон тумани аҳолиси боғдорчиликнинг ҳадисини олган. Миришкорлар гилос етиштиришнинг замонавий усулларини қўллашмоқда. Ҳудуддаги Gold Fresh Fruits масъулияти чекланган жамияти Яндама қишлоғи атрофида 900 гектарга яқин майдонда интенсив боғлар барпо этди. Бу боғларнинг 85 фоизини гилосзорлар ташкил қилади.
Тўрақўрғонлик боғбонлар айни чоғда Uzbek Cherry лойиҳаси устида қизғин иш олиб боряпти. Унинг умумий қиймати 45 миллион долларга тенг бўлиб, жорий йил охиригача интенсив боғдаги гилосзорлар 1000 гектарга етказилади. Улар тўла ҳосилга киргач, йилига 10000 тоннадан ошириб ҳосил олиш мумкин.
Изоҳ (0)