Razer компанияси CES тақдимотларида ноодатий қурилмалар концепциясини тақдим этиб келади. Ўтган йили учта дисплейга эга Project Valeriа ноутбуки намойиш этилганди, ҳатто битта прототипи ўша ернинг ўзида ўғирлаб кетилган. Жорий йилдаги кўргазмада эса Razer Phone смартфонини тўлақонли ноутбукка айлантирувчи Project Lindа док-станциясини тақдим этди, деб хабар берди Hi-Tech.Mail.Ru.
Смартфон тачпад ўрнида жойлашган махсус портга уланади. Ҳатто унинг корпусида бармоқ изи сканери учун ҳам жой мавжуд. Док-станциянинг ўзида эса монитор, клавиатура, аккумулятор, веб-камера, иккита микрофон, наушниклар учун 3,5 миллиметрли порт ва бошқа қурилмалар билан алоқани таъминлаш учун бир қанча электр симлари мавжуд. Барча амаллар смартфондаги Snapdragon 835 процессорининг қуввати ёрдамида амалга оширилади.
Док-станциядаги дисплейнинг диагонали 13,3 дюймга тенг. Ушбу экранга смартфон уланганида Android’нинг қайта ишланган версияси ишга тушади. Тизим орқали барча оддий дастурлардан фойдаланиш мумкин: почтани текшириш, ҳужжатлар билан ишлаш, видео кўриш ва ҳоказо.
Ҳозирча бу шунчаки прототип ҳисобланади, келажакда унинг техник тавсифлари яхшиланиши мумкин. Аммо ҳозирча бу каби док-станциянинг нархи қанча бўлиши очиқланмади.
Изоҳ (0)