Rаzer kompaniyasi CES taqdimotlarida noodatiy qurilmalar konsepsiyasini taqdim etib keladi. O‘tgan yili uchta displeyga ega Project Valeria noutbuki namoyish etilgandi, hatto bitta prototipi o‘sha yerning o‘zida o‘g‘irlab ketilgan. Joriy yildagi ko‘rgazmada esa Razer Phone smartfonini to‘laqonli noutbukka aylantiruvchi Project Linda dok-stansiyasini taqdim etdi, deb xabar berdi Hi-Tech.Mail.Ru.
Smartfon tachpad o‘rnida joylashgan maxsus portga ulanadi. Hatto uning korpusida barmoq izi skaneri uchun ham joy mavjud. Dok-stansiyaning o‘zida esa monitor, klaviatura, akkumulyator, veb-kamera, ikkita mikrofon, naushniklar uchun 3,5 millimetrli port va boshqa qurilmalar bilan aloqani ta’minlash uchun bir qancha elektr simlari mavjud. Barcha amallar smartfondagi Snapdragon 835 protsessorining quvvati yordamida amalga oshiriladi.
Dok-stansiyadagi displeyning diagonali 13,3 dyuymga teng. Ushbu ekranga smartfon ulanganida Android’ning qayta ishlangan versiyasi ishga tushadi. Tizim orqali barcha oddiy dasturlardan foydalanish mumkin: pochtani tekshirish, hujjatlar bilan ishlash, video ko‘rish va hokazo.
Hozircha bu shunchaki prototip hisoblanadi, kelajakda uning texnik tavsiflari yaxshilanishi mumkin. Ammo hozircha bu kabi dok-stansiyaning narxi qancha bo‘lishi ochiqlanmadi.
Izoh (0)