Ўзининг суратини доимий равишда ижтимоий тармоқларга жойлаш истаги ҳақиқатан ҳам касаллик ҳисобланади. Бундай хулосага Ҳиндистон ва Британия олимлари келди, деб ёзади «Naukatv.ru».
«Селфитис» касаллиги ҳақида биринчи марта дунё сохта янгиликлар сайти орқали хабар топган эди. Аммо энди аниқланишича, «селфитис»ни ҳақиқатан ҳам касаллик деб ҳисоблаш мумкин, у бошланғич, ўткир ва сурункали босқичларга эга.
Бошланғич босқичда одамлар кунига камида уч марта селфи олиб, аммо натижани ижтимоий тармоқларга жойламайди. Ўткир ҳолатда эса олинган селфилар ҳар куни интернетда пайдо бўлади. Сурункали босқич кеча-кундуз ва бошқариб бўлмайдиган равишда ўзини суратга олиш ва суратларни кунига камида олти марта интернетга жойлаш истаги билан намоён бўлади.
Тадқиқот иштирокчилари синовдан ўтиб, селфидан оладиган ҳис-туйғулари, дўстлари эътиборидан қониқиш даражаси, селфи орқали ўзлигини намоён қилиш ва бошқалар ҳақидаги саволларга жавоб берди. Сўнг олимлар ҳиндистонлик фаол Facebook фойдаланувчиларидан иборат 400 киши ўртасида сўров ўтказиб, селфининг онгга таъсир кўрсатиш кўламини ўрганди.
Тадқиқот асосан Ҳиндистонда ўтказилди, чунки айнан шу мамлакатда селфи олишга уриниш жараёнида келиб чиққан ўлимлар энг кўп қайд этилган.
Олимлар шундай хулосага келдики, «селфитис»га чалинганларнинг кўпчилиги эътибор етишмаслигидан ва ўзига ишонмаслигидан азоб чекади. Улар ўзининг жамиятдаги ўрнини билиб олиш ва ўзини гуруҳнинг бир қисми сифатида ҳис қилиш умидида доимий равишда ўз суратларини чоп этиб боради.
Изоҳ (0)